ნარკორეალიზატორების ადვოკატები ბრალდებულთა მდგომარეობის შესახებ საუბრობენ

თბილისის ღამის კლუბებში ნარკოტიკების რეალიზების ბრალდებით ერთ-ერთი დაკავებულის ადვოკატი გიორგი ფანცულაია აცხადებს, რომ მისი დაცვის ქვეშ მყოფი ისევ დუმილის უფლებას იყენებს. ფანცულაიას თქმით, ადვოკატებს საქმის მასალები ჯერ არ გადაცემია და იმედოვნებს, რომ ეს საკითხი მალე მოგვარდება, რათა ხვალინდელი სასამართლოსთვის დაცვის მხარემ მომზადება მოასწროს. ინფორმაციას სააგენტო "ინტერპრესნიუსი" ავრცელებს.

"ჩემი დაცვის ქვეშ მყოფის პოზიცია არ შეცვლილა. ის კვლავ იყენებს დუმილის უფლებას. მისი დაკავების ფაქტიდან 2 დღის შემდეგაც ის ინფორმაცია მაქვს, რასაც ის მაწვდის. მისი არც პირადი, არც მანქანის და არც საცხოვრებელი სახლის ჩხრეკისას არანაირი ნივთიერება არ ამოუღიათ. არც მის ორგანიზმში აღმოჩენილა რამე ნივთიერება. ამ პირების დაკავებაც, როგორც ვიცით, სხვადასხვა ლოკაციაზე მოხდა. არ მინდა, ვარაუდების საფუძველზე ვისაუბრო, რამდენად მყარად არის დაცვა ან ბრალდება ამ საქმეში, ამაზე მხოლოდ და მხოლოდ მას შემდეგ ვისაუბრებ, რაც საქმის მასალები გადმომეცემა და გავეცნობი",- თქვა ადვოკატმა გიორგი ფანცულაიამ.

ადვოკატი გაუთქმელობის ხელწერილთან დაკავშირებით განმარტავს, რომ მასზე ხელი არ მოუწერია.

კიდევ ერთი ბრალდებულის ადვოკატი გია გოროზია აცხადებს, რომ მისი დაცვის ქვეშ მყოფი დეპრესიულ მდგომარეობაშია, ნერვიულობს და არ იცის რას ეფუძნება მის მიმართ წარგენილი ბრალდება.

"ჩვენთვის არ არის იდენტიფიცირებული იმ ვიდეოჩანაწერებში ნამდვილად არის თუ არა ჩემი დაცვის ქვეშ მყოფი. რაც შეეხება მის მიმართ წაყენებულ ბრალდებას და ჰქონდა თუ არა მას შემხებლობა აღნიშნულ დანაშაულთან, დეტალებზე გაუთქმელობის ხელწერილის გამო, ვერ ვისაუბრებ. თუმცა, ამ ხელწერილის დადებაც გაუგებარია, რადგან საქმის მასალები გადმოცემული არ გვაქვს, შესაბამისად, შეზღუდული ვარ დეტალებზე ვისაუბრო. შესაძლებელია, საქმის მასალებში იყოს ისეთი უზუსტობა ან არასაკმარისი მტკიცებულება, რის გამოც შეგვზღუდეს საზოგადოებას სიმართლე ვუთხრათ. რაც შეეხება მოწმეებს, სავარაუდოდ, აქ მოწმე იქნება აგენტი, პირი, ვინც მოახდინა დანაშაულის გამოვლენა ან პროვოცირება", - განაცხადა გია გოროზიამ.

ღამის კლუბებში – „ბასიანსა“ და „გალერიში“ ნარკოტიკების რეალიზების ბრალდებით დაკავებულებისთვის აღკვეთის ღონისძიების შეფარდების საკითხზე სასამართლო დღეს იმსჯელებს.

11 მაისის ღამეს შსს-მ თბილისის ღამის კლუბებში სპეცოპერაცია ჩაატარა და 8 ნარკორეალიზატორი დააკავა. კლუბებში „ბასიანსა" და „გალერიში" ჩატარებული სპეცოპერაცია პარლამენტის შენობის წინ გააპროტესტეს. დღეს აქციის მეორე დღეა. 

ბოლო პერიოდში, საქართველოში ალაპარაკდნენ ახალი ნარკოტიკის შესახებ, რომელმაც, არსებული ინფორმაციით, უკვე რამდენიმე ადამიანის, მათ შორის ახალგაზრდების სიცოცხლე იმსხვერპლა.