ადვოკატი: მორჩაძე კალანდიას ნათესავია, სუბელიანს - არ იცნობს

ხორავას ქუჩაზე მომხდარი მკვლელობის საქმეზე დღეს დაკავებული მერაბ მორჩაძე წინასწარი დაკავების იზოლატორში გადაიყვანეს. ამის შესახებ ჟურნალისტებს მისმა ადვოკატმა ზაალ თავაძემ განაცხადა.

„დღეს 18საათზე ქუჩაში მოსამართლის ბრძანებით დააკავეს მეაბ მორჩაძე, რომელსაც შსს ედავება მოწმეებზე ზემოქმედებას. 24 საათის განმავლობაში გამოძიება წაუყენებს ბრალს. ამ ეტაპზე შემიძლია გითხრათ, რომ მომავალ წარსადგენ ბრალდებას მერაბი არ აღიარებს, რა თქმა უნდა. ის არის ჩვეულებრივი წესიერი მოქალაქე, რომელიც ამბობს, რომ არავითარი ინტერესი არ ჰქონია მას მოწმეებზე ზემოქმედების და არც საქმის მიმართ. ჩვენ მასალები ჯერ არ გადმოგვცემია. 

კალანდიებისა და მორჩაძეების ოჯახი არიან დიდი ხნის ნათესავები, თაობებიდან არის ჯერ კიდევ ურთიერთობა და როგორც მერაბმა განაცხადა, როცა უჭირს და ულხინს ერთმანეთს გვერდით უდგანან. ახლაც, გაჭირვებაში რომ იყვნენ, ბავშვებმა მიმართეს. მორჩაძის განმარტებით, მას არავითარი მითითება მათთვის არ მიუცია რომ რამე დაემალათ. ელემენტარული დახმარება სთხოვეს. არიან არასრულწლოვნები, სტრესულ სიტუაციაში ჩავარდნილები და იცოდნენ, რომ ჰყავდათ ასეთი ოჯახის მეგობარი და გვერდში დგომა თხოვეს.

მისი საქმიანობა და სამუაო ადგილი საქმესთან კავშირში არ არის. როგორც მერაბი აცხადებს ის ერთხელ შეხვდა მ.კ-ს, დედამისის თხოვნით წამოიყვანა სასამართლო პროცესიდან მანქანით. ეს იყო მ.კ-ს ბოლო ჩვენებიდან“, - აცხადებს თავაძე. 

ადვოკატის ინფორმაციით, დაკავებული და სუბელიანი ერთმანეთს არ იცნობენ. თუმცა მირზა სუბელიანიც კალანდიას ნათესავია.   

1973 წელს დაბადებული მერაბ მორჩაძე დღეს დააკავეს. ის ფიგურირებს მოზარდებთან დაკავშირებულ კიდევ ერთ სისხლის სამართლის საქმეში, როგორც ერთ-ერთი ფიგურანტის ბიძა. საქმე ეხება 31 იანვარს, საღამოს საბურთალოზე, წითელ ბაღში მომხდარ დანაშაულს, როდესაც 1-ლი ექსპერიმენტული სკოლის მოსწავლემ 35-ე სკოლის მოსწავლეები დაჭრა. არის თუ არა ამ ორ საქმეს შორის რაიმე ტიპის კავშირი, ჯერჯერობით უცნობია.  

31 მაისს ხორავას ქუჩაზე მოზარდების მკვლელობის საქმეზე მოსამართლემ განაჩენი გამოაცხადა. რასაც დაზარალებული მხარის, ერთ-ერთი მოკლული მოზარდის მამის, ზაზა სარალიძის პროტესტი მოჰყვა.

განაჩენის გამოცხადების შემდეგ საგანგებო პრესკონფერენცია გამართა მთავარმა პროკურორმაც და ამ საქმეზე პროკურატურის პოზიცია კიდევ ერთხელ განმარტა. დღის მეორე ნახევარში ირაკლი შოთაძემ თანამდებობა დატოვა.

მკვლელობის საქმეზე პარლამენტმა სპეციალური საგამოძიებო კომისია შექმნა, რომელმაც მუშაობა დღეს დაიწყო.

ხორავას ქუჩაზე მკვლელობის საქმე შინაგან საქმეთა სამინისტრომ დაიბრუნა გამოძიებაში და მას უშაულოდ მინისტრი გიორგი გახარია ხელმძღვანელობს.

შინაგან საქმეთა სამინისტროში 7 ივნისს მკვლელობის საქმის ერთ-ერთი მოწმის მამა, პროკურატურის ყოფილი თანამშრომელი მირზა სუბელიანი დაიბარეს, როემლიც მრავალსაათიანი დაკითხვის შემდეგ გაათავისუფლეს. 

მირზა სუბელიანი ხორავას ქუჩაზე მომხდარი მკვლელობის საქმეში ერთ-ერთი მოწმის მამაა. მისი სახელი დანაშაულიდან რამდენიმე საათში სოციალურ ქსელში განხილვის საგნად იქცა. 

2017 წლის 1 დეკემბერს თბილისის ცენტრში, ვერაზე ორი არასრულწლოვანი დავით სარალიძე და ლევან დადუნაშვილი დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.