საქართველომ რუსეთის წინააღმდეგ სტრასბურგის სასამართლოში ახალი საჩივარი შეიტანა

„საქართველო რუსეთის წინააღმდეგ“ - იუსტიციის სამინისტრომ რუსეთის ფედერაციის წინააღმდეგ სტრასბურგის სასამართლოში კიდევ ერთი საჩივარი შეიტანა.

საქმე ეხება ოკუპირებულ ტერიტორიებსა და საოკუპაციო ხაზის გასწვრივ მოსახლეობის მასობრივი შევიწროების, დაკავებების, თავდასხმებისა და მკვლელობების ადმინისტრაციულ პრაქტიკას, რომელიც განსაკუთრებით გაძლიერდა 2008 წლის ომის შემდეგ და კრიტიკულ ზღვარს მიაღწია თებერვალში, არჩილ ტატუნაშვილის წამებისა და მკვლელობის დროს.

ქართული მხარე მოითხოვს, რომ მოსკოვმა რამდენიმე მუხლით აგოს პასუხი. საქართველომ სტრასბურგის სასამართლოს მტკიცებულებები წარუდგინა. განსაკუთრებული ყურადღება ეთმობა არჩილ ტატუნაშვილის, გიგა ოთხოზორიასა და დავით ბაშარულის მკვლელობის საქმეებს.

ეს ევროპულ სასამართლოში საქართველოს მხრიდან რუსეთის წინააღმდეგ შეტანილი მესამე სარჩელია. მანამდე საქართველომ ევროპის ადამიანის უფლებათა სასამართლოში რუსეთის ფედერაციის წინააღმდეგ ორი სარჩელი შეიატანა. პირველი ეხებოდა რუსეთის ფედერაციიდან ქართველების დეპორტაციას 2006 წელს; ევროპის სასამართლომ დეპორტირებულების უფლებების შელახვა აღიარა. მეორე სარჩელი შეტანილია 2008 წელს და რუსეთ-საქართველოს ომში დანაშაულებებს და სამხრეთ ოსეთის ტერიტორიაზე საბრძოლო მოქმედებებს ეხება. ამ საქმის განხილვა ჯერ არ დასრულებულა.

დღესვე, წამების მსხვერპლთა რეაბილიტაციის ცენტრი „ემპათია“  ევროპულ სასამართლოში აგზავნის სარჩელს - „არჩილ ტატუნაშვილი რუსეთის ფედერაციის წინააღმდეგ“. სასამართლოში მთავარ მტკიცებულას წარმოადგენს ცენტრის მიერ მომზადებული 87-გვერდიანი კომპლექსურ-კომისიური დასკვნა, რომელშიც წერია, რომ 34 წლის არჩილ ტატუნაშვილი ცხინვალში წამებით მოკლეს.

სამხარაულის ბიურომ ტატუნაშვილის დაღუპვის მიზეზებზე ექსპერტიზის მანამდე უცნობი დეტალები 10 აგვისტოს გაასაჯაროვა.

საქართველოს მთავარმა პროკურატურამ, არჩილ ტატუნაშვილის საქმეზე ოკუპირებული ცხინვალის რეგიონის ე.წ სამართალდამცავი ორგანოს თანამშრომლებს ბრალი დაუსწრებლად 14 ივნისს წაუყენა. 15 ივნისს კი დავით გურწიევსა და ალიკ ტაბოევს მცხეთის რაიონულმა სასამართლომ აღკვეთის ღონისძიებად პატიმრობა დაუსწრებლად შეუფარდა. დანაშაული სასჯელის სახით თექვსმეტიდან ოც წლამდე, ან უვადო პატიმრობას ითვალისწინებს.

ტატუნაშვილის მკვლელობის საქმეს ქვეყანაში პოლიტიკური რეაგირებაც მოჰყვა. 2017 წლის 5 მარტს პარტია „ევროპულმა საქართველომ“ საპარლამენტო უმრავლესობას არჩილ ტატუნაშვილთან დაკავშირებით რეზოლუციის საერთო დოკუმენტის შექმნა შესთავაზა. 21 მარტს, საქართველოს პარლამენტმა რეზოლუციის პროექტი 106 ხმით დაამტკიცა.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას დაიღუპა.