ნარკოლოგიური ექსპერტიზის სამმართველოს უფროსი შსს-ში გამოკითხვაზე დაიბარეს

შსს-ს ორგანიზებულ დანაშაულთან ბრძოლის მთავარი სამმართველოს უფროსის მამუკა ჭელიძის განცხადებით, სამხარაულის ნარკოლოგიის ექსპერტიზის სამმართველოს უფროსი და ნარკომანიის პრევენციის ცენტრის დირექტორის მოადგილე გური მენაბდიშვილი შინაგან საქმეთა სამინისტროში, გამოკითხვაზე დაიბარეს. ამის შესახებ ჭელიძემ ბრიფინგზე განაცხადა.

„მედიაში გავრცელებული ინფორმაციისთანავე სამხარაულის ნარკოლოგიის ექსპერტიზის სამმართველოს უფროსი და ნარკომანიის პრევენციის ცენტრის დირექტორის მოადგილე გამოკითხვის მიზნით დაბარებულია შინაგან საქმეთა სამინისტროში“, - განაცხადა მამუკა ჭელიძემ. 

საქმე ეხება იმ განცხადებას, რომლის მიხედვითაც საქართველოშიც დაიწყეს ოპიუმის მოყვანა და ბაზარზე უკვე გამოჩნდა ქართული ჰეროინი. ამის შესახებ მენაბდიშვილმა „კვირის პალიტრისთვის“ მიცემულ ინტერვიუში ილაპარაკა.

„ოპიუმი მაღალმთაგორიან ტერიტორიაზე იზრდება. მას სიცხე უყვარს. ვერ დავადასტურებ, რომ საქართველოში არის ოპიუმის პლანტაციები, მაგრამ დანამდვილებით შემიძლია გითხრათ, რომ საქართველოს რეგიონებში უკვე აწარმოებენ კანაბისს და მას ახალგაზრდები მოიხმარენ. მაქვს ინფორმაცია, რომ არა მარტო კაცები, ქალებიც არიან აქტიური მომხმარებლები და როცა მშობლები საყვედურობენ, პირდაპირ ეუბნებიან, ჩვენგან რა გინდათ, სახელმწიფოში დაშვებულია, რატომ გვიკრძალავთო. საგანგაშო მდგომარეობაა პერიფერიებში, სადაც მასობრივად მოიხმარენ კანაბისს“, - აღნიშნა მენაბდიშვილმა.

მიმდინარე წლის 6 აგვისტოს მონაცემებით, ბოლო 6 თვეში საქართველოში 2154 ნარკოდანაშაულია   რეგისტრირებული.