პროკურატურა ომეგას საქმის ჩანაწერებს ექსპერტიზაზე ამოწმებს

მთავარი პროკურატურის ინფორმაციით, ომეგას საქმესთან დაკავშირებით, მედიაში გავრცელებულ აუდიოჩანაწერებზე ექსპერტიზა ჩატარდება. ამისათვის სხვადასხვა მედიასაშუალებიდან ეს ჩანაწერები უკვე გამოთხოვილია და მისი ავთენტიკურობის და მონაწილე პირთა იდენტიფიცირების მიზნით დანიშნულია შესაბამისი ექსპერტიზები. ამის შესახებ უწყების ვებგვერდზე გავრცელებულ განცხადებაშია ნათქვამი.

უწების ინფორმაციით, თბილისის პროკურატურაში გამოსაკითხად დაბარებულია „ომეგას“ დამფუძნებელი ზაზა ოქუაშვილიც, თუმცა მისი ადვოკატის განცხადებით, ის ამჟამად დიდ ბრიტანეთში იმყოფება და საქართველოში თვის ბოლოს დაბრუნდება. 

განცხადების თანახმად, თბილისის პროკურატურამ, გამოკითხვის მიზნით, 2018 წლის 25 სექტემბერს, მოწმის სახით გამოიძახა ომეგა ჯგუფში შემავალი სამი კომპანიის დირექტორი, თუმცა მათი ადვოკატის ცნობით, ეს პირები უწყებაში მითითებულ დროს ვერ მივიდოდნენ და ისინი  საგამოძიებო ორგანოში   2018 წლის 27 სექტემბერს გამოცხადდებიან.

ამასთან, გამოძიებამ, ომეგა ჯგუფში შემავალი კომპანიების საგადასახადო ვალდებულებების დადგენის  მიზნით, საქართველოს ფინანსთა სამინისტროს სსიპ შემოსავლების სამსახურიდან უკვე გამოითხოვა შესაბამისი ინფორმაცია.

პროკურატურა ირწმუნება, რომ დაიკითხება ჩანაწერებში მოქმედი ყველა პირი და დამატებითი ინფორმაცია ეცნობება საზოგადოებას.

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო.

„ომეგა ჯგუფთან“ დაკავშირებულ სავარაუდო კორუფციულ სკანდალს ფარული ჩანაწერის ერთ-ერთი ფიგურანტია, კონკურენციის სააგენტოს ხელმძღვანელი ნოდარ ხადური. ის ჩანაწერს ცრუს უწოდებს და „ომეგას“ საქმესთან კავშირს კატეგორიულად უარყოფს.

პატივისა და ღირსების შელახვისთვის სამართლებრივ დავას აპირებს ოქუაშვილისა და ყიფიანის მიმართ ეკონომიკის ყოფილი მინისტრი დიმიტრი ქუმსიშვილი.

პირველი ჩანაწერი რამდენიმე დღის წინ "იბერიას" ეთერში გამოქვეყნდა, რომლის მფლობელიც "ომეგა ჯგუფია".

არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“. ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს.      

"იბერიისა" და "ომეგა ჯგუფის" თემას 12 სექტემბერს პრემიერმინისტრი მამუკა ბახტაძე გამოეხმაურა და განაცხადა, რომ ფინანსთა სამინისტრო და შემოსავლების სამსახური სანქციების დაწესებისგან მაქსიმალურად ცდილობდა თავის შეკავებას. ბახტაძის თქმით, უწყებებმა კომპანია 11-ჯერ გააფრთხილეს, თუმცა ამის შემდეგ ვალი კიდევ უფრო გაიზარდა.

14 სექტემბერს სპორტის ყოფილმა მინისტრმა ლევან ყიფიანმა „საქართველოს რკინიგზის“ სამეთვალყურეო საბჭოს წევრის პოზიცია დატოვა. 17 სექტემბერს კი ის პროკურატურაში გამოკითხეს.