„ომეგა ჯგუფის“ ერთ-ერთი დირექტორი სასამართლო წესით დაკითხვას ითხოვს

თბილისისი პროკურატურაში "ომეგა ჯგუფის" საქმეზე ძიების პროცესი გრძელდება. სატელეფონო ჩანაწერების გავრცელების და ბიზნესზე სავარაუდო ზეწოლის ფაქტებთან დაკავშირებით, დილიდან საგამოძიებო უწყებაში "ომეგა ჯგუფის" სამი დირექტორია დაბარებული - მათ შორის არიან: ზაზა ოქუაშვილი, ირაკლი ჩუბინიშვილი და გიორგი ქურდაძე.

გიორგი ქურდაძემ საგამოძიებო უწყების შენობა უკვე დატოვა. როგორც მან ჟურნალისტებთან განაცხადა, გამომძიებლებთან არ თანამშრომლობს და სასამართლო წესით დაკითხვას ითხოვს.

"მე მსურდა, რომ დავკითხულიყავი სასამართლოში, ეს ჩემი კანონიერი უფლებაა. მე ყველაფერს ვიტყვი, თუ რამე ინფორმაცია გამაჩნია და არ დავმალავ და ვითანამშრომლებ გამოძიებასთან. ძალიან მალე მოხდება ჩემი დაკითხვა სასამართლოში. გამომძიებლებმა გამაცნეს პროცედურები. ნამდვილად მნიშვნელოვანი ინფორმაციაა და დაეხმარება გამოძიებას. იმედი მაქვს, რომ ყველაფერი სამართლიანად წარიმართება. ერთი თხოვნა მაქვს, თქვენი მედიასაშუალებით რომ მივაწოდო ინფორმაცია, დღესდღეობით ფაბრიკა გაჩერებულია, არ მუშაობს უკვე მესამე თვეა. ჩვენ გვქონდა შეხვედრები პრემიერთანაც და ფინანსთა მინისტრთანაც, ჩვენი თხოვნაა, რომ ამუშავდეს ეს საწარმო. ეს საგამოძიებო პროცესი გაგრძელდება და ამას ალბათ ერთ თვეში სავარაუდოდ არ მორჩება და მაგის ლოდინი რომ ჯერ ამას დაველოდო და მერე მოხდეს, ეს ალბათ არასწორი იქნება რადგან ბევრი ხალხი უმუშევარი დარჩა.

ბატონ მამუკას ძალიან პატივს ვცემ. რომ მოვიდა პრემიერმინისტრად და ფინანსთა მინისტრად, შეხვედრა გვქონდა ჩვენ - ინდუსტრიის მონაწილე კომპანიებს. დაგვპირდა, რომ დაგვეხმარებოდა ყველანაირად, რათა სამართლიანი ყოფილიყო ბაზარზე პირობები, ყველანაირი პრობლემების გარეშე გვემუშავა. ჩვენ თანახმა ვართ, რომ კანონის ფარგლებში გაგვიფორმონ რესტრუქტურიზაცია. ეს განცხადება მივაწოდეთ 25 აპრილს. ახლა სასამართლოში გვაქვს შეტანილი. ბატონი მამუკა როდესაც მოვიდა, თქვა, რომ თითოეული სამუშაო ადგილი არის პრიორიტეტული და არ დაუშვებდა მათ დაკარგვას", - განაცხადა გიორგი ქურდაძემ.

სასამართლო წესით დაკითხვას ითხოვს „ომეგა ჯგუფში“ შემავალი კომპანია "ომეგა მოტორსის" დირექტორი ლელი აბულაძე.

26 სექტემბერს გაირკვა, რომ "ომეგა ჯგუფმა" ლონდონის სასამართლოში საქართველოს მოქმედი და ყოფილი მაღალჩინოსნების წინააღმდეგ სამართლებრივი პროცედურა დაიწყო. ამის შესახებ "ომეგა ჯგუფის" ადვოკატმა კოლინ გიბსონმა თქვა. 

მედიაში გავრცელებული ჩანაწერების გამო პროკურატურაში გამოძიება 12 სექტემბერს დაიწყო, ჩანაწერებზე ექსპერტიზის ჩატარება იგეგმება. 

პირველი ჩანაწერი რამდენიმე კვირის წინ "იბერიას" ეთერში გამოქვეყნდა, რომლის მფლობელიც "ომეგა ჯგუფია". არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“. ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს.   

„ომეგა ჯგუფთან“ დაკავშირებული სავარაუდო კორუფციული სკანდალის ფარული ჩანაწერის ერთ-ერთი ფიგურანტია კონკურენციის სააგენტოს ხელმძღვანელი ნოდარ ხადური. ის ჩანაწერს ცრუს უწოდებს და „ომეგას“ საქმესთან კავშირს კატეგორიულად უარყოფს.

პატივისა და ღირსების შელახვისთვის სამართლებრივ დავას აპირებს ეკონომიკის ყოფილი მინისტრი დიმიტრი ქუმსიშვილი.

"იბერიისა" და "ომეგა ჯგუფის" თემას 12 სექტემბერს პრემიერმინისტრი მამუკა ბახტაძე გამოეხმაურა და განაცხადა, რომ ფინანსთა სამინისტრო და შემოსავლების სამსახური სანქციების დაწესებისგან მაქსიმალურად ცდილობდა თავის შეკავებას. ბახტაძის თქმით, უწყებებმა კომპანია 11-ჯერ გააფრთხილეს, თუმცა ამის შემდეგ ვალი კიდევ უფრო გაიზარდა.

14 სექტემბერს სპორტის ყოფილმა მინისტრმა ლევან ყიფიანმა „საქართველოს რკინიგზის“ სამეთვალყურეო საბჭოს წევრის პოზიცია დატოვა. 17 სექტემბერს კი ის პროკურატურაში გამოკითხეს.