ლევან ყიფიანი: მე და ზაზა ოქუაშვილი შეთანხმებულად ვმოქმედებდით

თბილისში საქალაქო სასამართლოში დაკითხვიდან გამოსულმა სპორტის ყოფილმა მინისტრმა ლევან ყიფიანმა განაცხადა, რომ სახელმწიფოსგან ზეწოლაზე ჩანაწერები ომეგა ჯგუფის ხელმძღვანელთან ერთად, შეთანხმებულად, ჩაწერა.

„არ ვიცი ეს იყო ჩემი მიამიტობა თუ სურვლი, რომ დავხმარებოდი, ვყოფილიყავი მის გვერდით მდგომი. მივიღე ეს გამოწვევა, განვახორციელეთ ერთობლივად. უბედურება ისაა, რომ ამ ჩანაწერებს აკეთებს დიდი ხანია. ის ჩანაწერებიც კი, რომელიც ერთობლივად გავაკეთეთ, დამონტაჟებულია“, - აცხადებს ყიფიანი.

მისი თქმით, ის მუშაობდა ომეგა ჯგუფში და მისი მოვალეობა იყო სხვა პირებთან კონტაქტის დამყარება.

ლევან ყიფიანმა საზოგადოებას და ოჯახს ბოდიში მოუხადა.

"ზაზა ოქუაშვილმა ერთ-ერთი შეხვედრისას შემომთავაზა მივსულიყავი მასთან და რადგან მისი ბიზნესი წნეხს განიცდიდა უცხოელი პარტნიორებისგან, საქართველოში ბიუჯეტის გადასახადისგან. მან გადაწყვიტა ჩაგვეწერა მაკომპრომეტირებელი მასალა. მან მითხრა, რომ შიდა წარმოებისთვის სჭირდებოდა. ამით ის დაარწმუნებდა უცხოელ პარტნიორებს, რომ საქართველოს ხელისუფლება წნეხს ახორციელებდა მასზე და გადავადებას მოსთხოვდა. შესაბამისად, ეს მოგვარდებოდა საქართველოშიც", - განაცხადა ლევან ყიფიანმა.

პირველი ჩანაწერი რამდენიმე კვირის წინ "იბერიას" ეთერში გამოქვეყნდა, რომლის მფლობელიც "ომეგა ჯგუფია". არხი ამტკიცებს, რომ ხელისუფლება „ომეგას“ ბიზნესზე ზეწოლით მას ავიწროებს და „თავისუფალი სიტყვის ჩახშობა სურს“. ფინანსთა მინისტრმა ბრალდებები უარყო და განაცხადა, რომ „ომეგა ჯგუფს“ 51 მილიონ ლარზე მეტი საგადასახადო დავალიანება აქვს და სახელმწიფოსგან შეღავათიანი რეჟიმის დაწესების მიუხედავად ვალის გადახდა არ სურს, ტელევიზიას კი შანტაჟისთვის იყენებს.   

„ომეგა ჯგუფთან“ დაკავშირებული სავარაუდო კორუფციული სკანდალის ფარული ჩანაწერის ერთ-ერთი ფიგურანტია კონკურენციის სააგენტოს ხელმძღვანელი ნოდარ ხადური. ის ჩანაწერს ცრუს უწოდებს და „ომეგას“ საქმესთან კავშირს კატეგორიულად უარყოფს.

პატივისა და ღირსების შელახვისთვის სამართლებრივ დავას აპირებს ეკონომიკის ყოფილი მინისტრი დიმიტრი ქუმსიშვილი.

"იბერიისა" და "ომეგა ჯგუფის" თემას 12 სექტემბერს პრემიერმინისტრი მამუკა ბახტაძე გამოეხმაურა და განაცხადა, რომ ფინანსთა სამინისტრო და შემოსავლების სამსახური სანქციების დაწესებისგან მაქსიმალურად ცდილობდა თავის შეკავებას. ბახტაძის თქმით, უწყებებმა კომპანია 11-ჯერ გააფრთხილეს, თუმცა ამის შემდეგ ვალი კიდევ უფრო გაიზარდა.

14 სექტემბერს სპორტის ყოფილმა მინისტრმა ლევან ყიფიანმა „საქართველოს რკინიგზის“ სამეთვალყურეო საბჭოს წევრის პოზიცია დატოვა. 17 სექტემბერს კი ის პროკურატურაში გამოკითხეს.