ბიზნესმენის შვილის გატაცებაზე ახალი დეტალები გახდა ცნობილი

ბიზნესმენ ამირან დეკანოიძის შვილის, გიორგი დეკანოიძის გატაცების საქმეზე, რომელზეც ათკაციანი დანაშაულებრივი ჯგუფი დააკავეს, ახალი დეტალები გახდა ცნობილი. 1tv-ს ინფორმაციით, გატაცება ცოლ-ქმარმა დაგეგმა. ისინი მოსკოვში ცხოვრობდნენ და საქართველოში ერთი კვირის წინ დაბრუნდნენ. კაცი ამავე ბრალდებით წარსულში ერთხელ უკვე ნასამართლევია.

დაკავებულებს შორის არის ქალის შვილიც, რომელიც ბრალს არ აღიარებს და გამოძიებასთან თანამშრომლობას აპირებს. ის ამბობს, რომ დანაშაულთან კავშირი არ ჰქონია და დედისა და მამინაცვლის გეგმებზე არაფერი იცოდა. მისი ადვოკატის, ინგა შარაშენიძის განცხადებით, მისი დაცვის ქვეშ მყოფი გატაცების მომენტში დანაშაულის ადგილზე არ იმყოფებოდა.

ინგა შარაშენიძე გატაცების საქმეში საერთო ჯამში ორი პირის უფლებებს იცავს, ადვოკატის თქმით, ორივე გამოძიებასთან ითანამშრომლებს.

„ორივეს შევხვდი, ორივეს ვესაუბრე, ისინი უდანაშაულოები არიან. მართალია, მათ რიგებში აღმოჩნდნენ, მაგრამ არანაირი შემხებლობა არ ჰქონიათ არც გატაცებასთან, არც გამოძალვასთან და შესაბამისად, მონაწილეობა არ მიუღიათ”, – აცხადებს ადვოკატი.

ადვოკატის ინფორმაციით, ბრალს დაკავებულებს სავარაუდოდ დღის ბოლომდე წაუყენებენ.

შინაგან საქმეთა სამინისტროს ოფიციალური ინფორმაციით, ახალგაზრდა კაცის გატაცების ბრალდებით ათკაციანი ჯგუფი დააკავეს. უწყების ცნობით, გამოძიებამ დაადგინა, რომ დაკავებულებმა 1995 წელს დაბადებულ ახალგაზრდას თბილისის ერთ-ერთ ქუჩაზე უკანონოდ აღუკვეთეს თავისუფლება და გაურკვეველი მიმართულებით გაიტაცეს.

მათივე ინფორმაციით, შინაგან საქმეთა სამინისტროს მიმართა გატაცებულის მამამ და აცნობა, რომ გამტაცებლები მას მობილურ ტელეფონზე დაუკავშირდნენ, შვილის გამოსასყიდად დიდი ოდენობით თანხა მოსთხოვეს, ფულის გადაუხდელობის შემთხვევაში კი მძევლის მოკვლით დაემუქრნენ.

პოლიციამ ბიზნესმენ ამირან დეკანოიძის შვილი სპეცოპერაციის შედეგად გაათავისუფლა.

მომხდარზე გამოძიება სისხლის სამართლის კოდექსის 144-ე მუხლით მიმდინარეობს, რაც გულისხმობს მძევლად ხელში ჩაგდებას და 9-დან 14 წლამდე თავისუფლების აღკვეთას ითვალისწინებს.