ახალქალაქში ფიზიკურ დაპირისპირებასთან დაკავშირებით 5 პირს ბრალი წარედგინა

ახალქალაქში 30 ოქტომბერს ფიზიკურ დაპირისპირებასთან დაკავშირებით 5 პირს ბრალი წარედგინა. ინფორმაციას საქართველოს მთავარი პროკურატურა ავრცელებს.

უწყების ცნობით, 5 პირს ფაქტზე ბრალი 126 მუხლის პირველი პრიმა ნაწილით წარედგინა.

გამოძიებით დგინდება, რომ 30 ოქტომბერს ქალაქ ახალქალაქში, თამარ მეფის ქუჩაზე მდებარე პოლიტიკური პარტია „ნაციონალური მოძრაობის“ შტაბთან, რამდენიმე პირს შორის მოხდა ფიზიკური დაპირისპირება, რა დროსაც სხეულის დაზიანება მიიღეს „ნაციონალური მოძრაობის“ შტაბის წევრებმა.

გამოკითხვებიდან დგინდება, რომ დაპირისპირების მიზეზი 30 ოქტომბერს, ღამის საათებში „ნაციონალური მოძრაობის“ აქტივისტების მიერ რამდენიმე ავტოგასამართ სადგურზე საარჩევნო პლაკატების ჩამოხევა გახდა, რის შემდეგაც მათ ბენზინგასამართი სადგურის ტერიტორიაზე სადგურის თანამშრომლებთან სიტყვიერი შეურაცხყოფა მიაყენეს.

გამოძიება საწყის ეტაპზე საქართველოს სისხლის სამართლის კოდექსის 239-ე მუხლის მე-2 და მე-3 ნაწილებით დაიწყო, რაც შემდგომში გადაკვალიფიცირდა და 126-ე მუხლის პირველი პრიმა ნაწილით გრძელდება“, - ნათქვამია პროკურატურის განცხადებაში.

დაპირისპირების დროს ნაცემი აქტივისტები ტრავმატოლოგიურ კლინიკაში გამოკითხეს.