ზაზა სარალიძემ სააპელაციო სასამართლო პროტესტის ნიშნად დატოვა

თბილისის სააპელაციო სასამართლოში ხორავას ქუჩის საქმეზე პროცესი მიმდინარეობს. პროცესის დაწყებამდე სასამართლოში ხმაური იყო. ინფორმაციას სააგენტო "ინტერპრესნიუსი" ავრცელებს.

დავით სარალიძის უკმაყოფილება მასსა და პროკურორებს შორის კომუნიკაციის ნაკლებობამ გამოიწვია. სარალიძემ სასამართლო დარბაზი პროტესტის ნიშნად დატოვა.

„როგორც მოიაზრება სახელმწიფოს მხრიდან თუ კანონმდებლობის მხრიდან, პროკურორები არიან ჩემი უფლება წარმომადგენლები, ხომ ასეა? ადამიანი გამოდის და ზედაც არ მიყურებს, გზას აგრძელებს, მივდივარ, ვეკითხები რაღაცას და ვერაფერს ვგებულობ, მემალებიან. სააპელაციოში რომ გასაჩივრდა და ახალი პროკურორები დაინიშნენ, ახლა სულ სხვაა. ალბათ, კიდევ შეცვლიან და ასე თამაშობენ, დახტიან აქეთ-იქით თავიანთ ჭკუაზე. ალბათ, ყველას თავის ჭკუაზე ვერ ატარებენ და ამიტომ იცვლებიან. რა აზრი აქვს პროცესს რომ დავესწრო? ჩემი უფლებაწარმომადგენელი ზედაც არ მიყურებს. იქ დავესწრო?" - განაცხადა სხდომათა დარბაზიდან გამოსულმა ზაზა სარალიძემ.

მან პროცესის დაწყებამდე სასამართლო პროცესებს „თამაში“ უწოდა.

„ეს ყველაფერი არის სისულელე, რომელიც ხდება პროკურატურის მხრიდან, იქიდან გამომდინარე, რომ პირველ ინსტანციაშიც ისე დასრულდა საქმე, როგორც უნდა დასრულებულიყო. სამწუხაროდ, პროკურატურას მკვლელები არ გამოუვლენია და ვერც მეორე ინსტანციის სასამართლო ვერ გამოავლენს ახალ ფიგურანტებს. ჩემთვის ეს თამაშია", - დასძინა სარალიძემ.

პირველი ინსტანციის განაჩენით გ.ჯ-ს, რომელსაც ბრალად ედებოდა დავით სარალიძის განზრახ მკვლელობა, წარდგენილი ბრალი გადაუკვალიფიცირდა და ის სასამართლომ დამნაშავედ ცნო მკვლელობის მცდელობისთვის. სასჯელის ვადად ცხრა წლითა და ცხრა თვით თავისუფლების აღკვეთა მიესაჯა.

არასრულწლოვან გ.ბ-ს ბრალად ედებოდა როგორც დავით სარალიძის, ასევე ლევან დადუნაშვილის მკვლელობა, თუმცა სასამართლომ ის დამნაშავედ ცნო ლევან დადუნაშვილის მკვლელობისთვის და სასჯელის ვადად განესაზღვრა 10 წლითა და ექვსი თვით თავისუფლების აღკვეთა.

პროკურატურა განაჩენს სწორედ შეცვლილი კვალიფიკაციის ნაწილში ასაჩივრებს. გ.ჯ-ს ადვოკატების ინფორმაციით, მეორე ინსტანციაში ისინი ახალ მტკიცებულებას წარადგენენ, ეს არის ალტერნატიული ექსპერტიზა, რომელიც ბრიტანელმა ექსპერტებმა ჩაატარეს.

ხორავას ქუჩაზე ორი არასრულწლოვანი დავით სარალიძე და ლევან დადუნაშვილი 2017 წლის 1 დეკემბერს დაჭრეს. ერთი მოზარდი საავადმყოფოში მიყვანამდე გარდაიცვალა. მეორე - მრავლობითი დაზიანებებით საავადმყოფოში მოთავსებიდან მეორე დღეს, 2 დეკემბერს გარდაიცვალა.