მოსყიდვის სავარაუდო ფაქტებზე გავრცელებული ინფორმაციის საფუძველზე გამოძიება დაიწყო

საპრეზიდენტო არჩევნების მეორე ტურის დამკვირვებლების მიერ დასახელებულ მოსყიდვის სავარაუდო ფაქტებზე პროკურატურამ გამოძიება ბათუმის, ქარელისა და აბაშის საარჩევნო უბნებზე მომხდარ დარღვევებთან დაკავშირებით დაიწყო. ინფორმაციას 1tv.ge ავრცელებს.

"კერძოდ, აჭარის პროკურატურაში ორ შემთხვევაში გამოძიების დაწყებას საფუძვლად დაედო არასამთავრობო ორგანიზაცია „საერთაშორისო გამჭვირვალობა საქართველოს“ მიერ გამოქვეყნებული ინფორმაცია, რომლის მიხედვითაც ბათუმის 79-ე საარჩევნო ოლქის 90-ე და მე-11 უბნებზე სავარაუდოდ ადგილი ჰქონდა ამომრჩევლის მოსყიდვის ფაქტს. ბათუმის 79-ე საარჩევნო ოლქის მე-4 უბანზე ამომრჩევლის სავარაუდო მოსყიდვის ფაქტთან დაკავშირებით კი გამოძიება დაიწყო ტელეკომპანია „რუსთავი 2“-ზე გასული სიუჟეტის საფუძველზე.

შიდა ქართლისა და მცხეთა მთიანეთის პროკურატურა #33 ქარელის საარჩევნო ოლქის N1 საარჩევნო უბნის მიმდებარე ტერიტორიაზე ამომრჩევლის სავარაუდო მოსყიდვის ფაქტს იძიებს", – აცხადებენ მთავარ პროკურატურაში.

ტელეკომპანია "იმედის" დაკვეთით GALLUP INTERNATIONAL-მა პრეზიდენტის არჩევნების მეორე ტურის ეგზიტპოლი ჩაატარა.

შედეგები ასე გადანაწილდა: სალომე ზურაბიშვილი - 58%, გრიგოლ ვაშაძე - 42%.

დღეს საქართველოს მოსახლეობამ 5-ის ნაცვლად 6 წლით, პირდაპირი წესით ბოლოჯერ აირჩია ქვეყნის პრეზიდენტი.

პირველი ტური 28 ოქტომბერს გაიმართა. ცესკოს მონაცემების თანახმად, „ქართული ოცნების“ მიერ მხარდაჭერილმა დამოუკიდებელმა კანდიდატმა სალომე ზურაბიშვილმა ხმების 38.64% მიიღო, „ნაციონალური მოძრაობის“ კანდიდატმა გრიგოლ ვაშაძემ - 37,74%.

2018 წლის საპრეზიდენტო არჩევნების მეორე ტურის საბოლოო შედეგებს შეგიძლიათ გაეცნოთ ამ ბმულზე.