ადვოკატი: სუსის ბრალდება თვალავაძის მიერ ქრთამის აღებაზე სიმართლეს არ შეესაბამება

სამედიცინო საქმიანობის სახელმწიფო რეგულირების სააგენტოს ყოფილი უფროსის გია თვალავაძის ადვოკატმა ტარიელ კაკაბაძემ განაცხადა, რომ სუსის ბრალდება, თვალავაძის მიერ ქრთამის აღების თაობაზე, სიმართლეს არ შეესაბამება.

"შემიძლია კატეგორიულად განვაცხადო, რომ გია თვალავაძეს აბსოლუტურად არაფერი აქვს საერთო ქრთამის აღების ფაქტთან. ის წლების განმავლობაში მუშაობდა საკმაოდ მაღალ თანამდებობაზე და კანონსაწინააღმდეგო ქმედებაში არასდროს ყოფილა შემჩნეული. როგორც ჩანს, ცდილობენ რომ პატიმრობიდან გათავისუფლებულ გია თვალავაძეს როგორმე შეუკოწიწონ ახალი საქმე და წაუყენონ ბრალდება ქრთამის აღების მუხლით.

მე, როგორც ბრალდებულის ადვოკატი, კარგად ვიცნობ საქმეში არსებულ მტკიცებულებებს და შემიძლია დაბეჯითებით ვთქვა, რომ არ არსებობს მტკიცებულება, რომელიც მისგან ქრთამის აღებას ადასტურებს. კანონის ფარგლებში გამოვიყენებთ ყველა ბერკეტს და არ დავუშვებთ უდანაშაულო, ღირსეული ადამიანის დასჯას," - აცხადებს კაკაბაძე.

4 დეკემბერს სახელმწიფო უსაფრთხოების სამსახურის ანტიკორუფციული სააგენტოს თანამშრომლებმა დიდი ოდენობით ქრთამის აღებაში დახმარების ფაქტზე შპს „რეგიონული ჯანდაცვის ცენტრის“ დირექტორის მოადგილე ნუგზარ ჯ. დააკავეს.

სუსის ცნობით, აფთიაქების დირექტორები და ფაქტობრივი მფლობელები მატერიალური სარგებლის მიღების მიზნით, უნებართვოდ და სანებართვო პირობების უხეში დარღვევით, შესაბამისი რეცეპტის გარეშე ყიდდნენ ფსიქოტროპული და სპეციალურ კონტროლს დაქვემდებარებულ მედიკამენტებს, რითაც დიდი ოდენობით შემოსავალს იღებდნენ.

გამოძიების მიხედვით, აფთიაქების მფლობელები, 2017 წლის სექტემბრიდან 2018 წლის ივლისის ჩათვლით, ყოველთვიურად ფსიქოტროპული მედიკამენტების უნებართვოდ რეალიზაციის მფარველობისთვის, სსიპ „სამედიცინო საქმიანობის სახელმწიფო რეგულირების სააგენტოს“ უფროსისთვის - გია თვალავაძისთვის გადასაცემად ნუგზარ ჯ-ს დიდი ოდენობით თანხებს უხდიდნენ.

სახელმწიფო უსაფრთხოების სამსახურის  ანტიკორუფციული სააგენტოს თანამშრომლებმა ამ საქმეზე პასუხისგებაში მისცეს 21 პირი. ბრალდებულებმა მაქინაციის შედეგად 4 094 709 ლარის უკანონო შემოსავალი მიიღეს.

24 ოქტომბერს სააფთიაქო ნარკომანიის საქმეზე დაკავებული სამედიცინო საქმიანობის სახელმწიფო რეგულირების სააგენტოს ყოფილი უფროსი გია თვალავაძე სასამართლო დარბაზიდან გირაოთი გაათავისუფლეს. მოსამართლემ პატიმარს აღკვეთის ღონისძიება პატიმრობა 20 000 ლარის გირაოთი შეუცვალა.