7 ნოემბრისა და იმედის დარბევის საქმეზე ჩვენება გაჩეჩილაძემ, კუკავამ და ძიძიგურმა მისცეს

7 ნოემბრისა და "ტელეიმედის" საქმეზე თბილისის საქალაქო სასამართლოში 4 მოწმე გამოიკითხა. ლევან გაჩეჩილაძემ, კახა კუკავამ, ზვიად ძიძგურმა და ბადრი პატარაკაციშვილის მეგობარმა, ტარიელ შავერდაშვილმა იმ სისასტიკეზე ისაუბრეს, რასაც სპეცრაზმი აქციის მონაწილეთა მიმართ იჩენდა.

მაშინდელი ოპოზიციის წარმომადგენლები ტელეიმედში სპეცდანიშნულების რაზმის შეჭრისას, შენობაში იმყოფებოდნენ.

როგორც პროცესზე ლევან გაჩეჩილაძემ თქვა, მაშინ 7 ნოემბრის აქციებზე მათ პოლიტიკური მოთხოვნები ჰქონდათ. კერძოდ, გირგვლიანის საქმის გამოძიება, საპარლამენტო არჩევნების კონსტიტუციურ ვადებში დაბრუნება და პოლიტპატიმრების გათავისუფლება. მან 7 ნოემბერს მომხდარი ამბავი ასე აღწერა:

"ხორცის გასატარებელი მანქანასავით იყო, არ ინდობდნენ ხალხს. პირველად დავინახე ნაცემი გოგა ხაინდრავა, რომელსაც ბორკილები დაადეს. ვნახე, როგორ წაართვეს კამერები მედიას. მერე მომრავლდნენ შავნიღბიანები და კიდევ უფრო მეტი სისასტიკე იყო. სპეცრაზმელებმა შემათრიეს სადღაც, გავითიშე, როდესაც თვალი გავახილე, სასწრაფო დახმარების მანქანაში ვიყავი, რომელსაც მე და ჩემი ძმა მივყავდით", - თქვა გაჩეჩილაძემ.

პროცესზე 7 ნოემბრის მოვლენები გაიხსენა ზვიად ძიძიგურმაც. მისი თქმით, ეს აქცია მაშინდელი ხელისუფლების მხრიდან სადამსჯელო ღონისძიება იყო. "მაქვს ეჭვი, რომ ისინი სააკაშვილის პარტიული აქტივისტები ანუ ე.წ ზონდერები იყვნენ. ჯინსებიანი ადამიანებისგან საკმაოდ უწმაწური სიტყვები ისმოდა, მათ შორის ბადრი პატარკაციშვილზე. მიხეილ სააკაშვილის გარეშე არაფერი წყდებოდა", - თქვა ძიძიგურმა.

წელს 2007 წლის 7 ნოემბრის მოვლენებიდან 11 წელი გავიდა. სამი დარბევა ერთ დღეს, აქციის დაშლა რუსთაველის გამზირსა და  რიყეზე, შეჭრა ტელეკომპანია „იმედში“ - სპეცდანიშნულების რაზმმა მომიტინგეების წინააღმდეგ ცრემლმდენი გაზი, ხელკეტები, რეზინის ტყვიები, აკუსტიკური იარაღი და წყლის ჭავლი გამოიყენა.

7 ნოემბრის საღამოს კი სპეცრაზმი ტელეკომპანია „იმედში“ შემოიჭრა და არხის მაუწყებლობა გათიშა. ამის შემდეგ იყო საგანგებო მდგომარეობა და ვადამდელი საპრეზიდენტო არჩევნები. 2008 წელს კი ტელეკომპანია „იმედი“ დამფუძნებლის, ბადრი პატარკაციშვილის გარდაცვალებიდან რამდენიმე დღეში, მის ოჯახს ჩამოართვეს.

პროკურატურამ ტელეკომპანია „იმედში“ შეჭრის და მისი დარბევის ფაქტზე შინაგან საქმეთა სამინისტროს სპეციალური ოპერატიული დეპარტამენტის ყოფილი დირექტორი ერეკლე კოდუა სამსახურებრივი უფლებამოსილების გადამეტების ბრალდებით პასუხისგებაში მისცა. ამ საქმეზე მიხეილ სააკაშვილს, ზურაბ ადეიშვილსა და დავით კეზერაშვილს პატიმრობა 2014 წლის 1 აგვიტოს შეეფარდათ.