თემურ აბაზოვს გამამართლებელი განაჩენის იმედი აქვს

მარნეულის ყოფილ მერს იმედი აქვს, რომ მოსამართლე მის საქმეზე გამამართლებელ განაჩენს გამოიტანს. ამის შესახებ მან რუსთავის საქალაქო სასამართლოში სხდომისას განაცხადა. ინფორმაციას სააგენტო "ინტერპრესნიუსი" ავრცელებს.

თემურ აბაზოვის თქმით, ის და მისი ოჯახი ამ საქმეში მსხვერპლია.

"მე თავიდანვე ვამბობდი, რომ ვარ უდანაშაულო, ვარ მსხვერპლი, ჩემი ოჯახია პირველ რიგში მსხვერპლი. მოლოდინი მაქვს, რომ მოსამართლე მიიღებს სწორ გადაწყვეტილებას და გამამართლებს. შედგა საპროცესო გარიგება, შემეფარდა გირაო. ხედავთ, რომ ჩვენ პროცესზე ჩვეულ რეჟიმში ვცხადდებით ხელს არ ვუშლით სასამართლო პროცესს", - თქვა თემურ აბაზოვმა.

რუსთავის საქალაქო სასამართლოში მარნეულის ყოფილი მერის თემურ აბაზოვის, აზერ სულიემანოვის, ელჩინ გულიევისა და რამინ ალახვერდიევის საქმეზე, მოწმეთა დაკითხვა დასრულდა. დღეს სასამართლოს მიერ ქვემო ქართლის საოლქო პროკურატურის გამომძიებლები დაიკითხნენ, რომელთაც გამოძიების პროცესში მოძიებულ და მოკვლეულ მტკიცებულებებზე ისაუბრეს.

13 დეკემბერს თემურ აბაზოვი მოსამართლემ დაცვის მხარის შუამდგომლობის საფუძველზე მოსამართლემ 10000-ლარიანი გირაოს სანაცვლოდ გაათავისუფლა. 

6 სექტემბერს თემურ აბაზოვს ​ბრალი დაუმძიმდა. მის მიმართ წარდგენილ ბრალდებას პირადი ცხოვრების ამსახველი მასალის მოპოვება, ორგანიზება, ინტერნეტით და სოციალური ქსელებით გავრცელება დაემატა.

13 ივნისს სოციალურ ქსელში გავრცელდა ვიდეო, რომელშიც ნაჩვენებია, როგორ დააკავეს აქციის ერთ-ერთი მონაწილე, მარნეულის მკვიდრი, ელჩინ ალახვერდიევი, ძალით მოაშარდინეს და შარდი სახეზე წაასმევინეს. მარნეულის მერს ინციდენტში მონაწილეობა ბრალდებოდა. თემურ აბაზოვი ამ ინციდენტის საქმეზე 13 ივნისს დააკავეს.

რუსთავის საქალაქო სასამართლოს გადაწყვეტილებით, მარნეულის მერს აღკვეთის ღონისძიების სახით პატიმრობა 14 ივნისს შეეფარდა.