გამოსაძიებელი საქმის ხანდაზმულობის ვადა შესაძლოა 5 წლით გახანგრძლივდეს

გამოსაძიებელი საქმის ხანდაზმულობის ვადა შესაძლოა, 5 წლით გახანგრძლივდეს. ამ ცვლილებას პარლამენტი დაჩქარებული წესით მიიღებს. მისი დამტკიცების შემთხვევაში, ზვიად გამსახურდიას საქმის გამოძიება ხანდაზმულობის ვადის გასვლის გამო არ შეწყდება. ამ საკითხზე ცვლილების მოთხოვნით პარლამენტს პრეზიდენტმა მიმართა.

როგორც იურიდიული კომიტეტის თავმჯდომარემ განმარტა, პრეზიდენტის მიმართვა იყო სწორი იმ აქცენტით, რომ პარლამენტმა საკანონმდებლო კუთხით არსებული შესაძლებლობები გამოიყენოს.

"შესაძლებელია ხანდაზმულობის ვადა გავზარდოთ 5 წლით, რაც შესაძლებელს გახდის, რომ ამ საქმეზე გამოძიება არ შეწყდეს ხანდაზმულობის მოტივით. მე ვფიქრობ, რომ არსებობს სისხლის სამართლის კოდექსში ცვლილების შეტანის გზა და მე პირადად მზად ვარ დავიწყო ამაზე მუშაობა. შემდეგი კვირისთვის შესაძლებელი იქნება ამის ინიცირება და მე დაველაპარაკებოდი კოლეგებს და იქნებ მოვახერხოთ და დაჩქარებული წესით მივიღოთ ეს ცვლილება, რომ მოესწროს. ეს არის ყველაზე მოკლე გზა, რომ ამ საქმეზე გამოძიება გაგრძელდეს", - განაცხადა ეკა ბესელიამ.

საქართველოს პირველი პრეზიდენტი, ზვიად გამსახურდია 1993 წლის 31 დეკემბერს, გამთენიისას, სამეგრელოს სოფელ ხიბულაში გაურკვეველ ვითარებაში გარდაიცვალა.

კონსტანტინე და ცოტნე გამსახურდიები პროკურატურის საზოგადოებრივი მისაღების შენობაში ექვსი დღეა შიმშილობენ. მათ პროკურატურამ შიმშილობის პირველ დღეს შეხვედრა შესთავაზა, რაზეც გამსახურდიებმა უარი თქვეს.

21 დეკემბერს, სალომე ზურაბიშვილმა პარლამენტს მიმართა, გაეთვალისწინებინა თხოვნა, რომ ზვიად გამსახურდიას მკვლელობის გამოძიების ხანდაზმულობის ვადა გაგრძელდეს.