პარლამენტში საერთო სასამართლოების შესახებ კანონპროექტზე მთელი დღეა მსჯელობენ

პარლამენტში საერთო სასამართლოების შესახებ კანონპროექტის განხილვა გრძელდება. თუმცა, ხმაურის ფონზე. საქართველოს პარლამენტის იურიდიულ საკითხთა კომიტეტის თავმჯდომარემ, ანრი ოხანაშვილმა ოპოზიციას მოუწოდა, „საერთო სასამართლოების შესახებ“ კანონპროექტის განხილვაზე პოლიტიკური ნარატივით არ ისაუბრონ.

"მესმის, თქვენ ცდილობთ განაზოგადოთ, რომ თურმე თქვენი ხელისუფლების პირობებში როგორი პროცესები მიმდინარეობდა, რომ თურმე თქვენი ამოცანაა სასამართლო სისტემის კიდევ უფრო გაუმჯობესება, თურმე თქვენ ხართ სასამართლო ხელისუფლებაზე მზრუნველი ადამიანები და თქვენ გაქვთ სურვილი, რომ იზრუნოთ, მაგრამ ამ ელემენტარულ ლოგიკაში, რასაც თქვენ ამბობთ, რომ თურმე ღია კენჭისყრა არის საფუძველი იმისა, რომ თქვენ ზრუნავდეთ ხელისუფლებაზე, არის საპირისპირო“, - განაცხადა ოხანაშვილმა.

„ევროპული საქართველოს“ წევრმა ხათუნა გოგორიშვილმა პარლამენტის პლენარულ სხდომაზე განაცხადა, რომ ვენეციის კომისია 2013 წელს ფარული კენჭისყრის მომხრე იყო, ხოლო ახლა ამის ღიაობას უჭერს მხარს, იმით არის განპირობებული, რომ უზენაესი სასამართლოს მოსამართლეთა შერჩევის პროცესი უნდა იყოს საჯარო.

"თქვენ რამდენჯერმე გაუსვით ხაზი იმას, რომ ეყრდნობით 2013 წლის რეკომენდაციას, მაგრამ ახლა არის 2019 წელი და ის, რომ იმავე ვენეციის კომისიამ ამ 6 წლის განმავლობაში შეიცვალა პოზიცია, ბევრი რამით არის განპირობებული. ალბათ, ვერ იტყვით, რომ ამ ხალხს ან თავისი დოკუმენტები არ ახსოვთ ან მეხსიერების პრობლემა აქვთ. უბრალოდ, შეიცვალა სიტუაცია ამ კონკრეტულ საკითხთან დაკავშირებით და ერთ-ერთი რაც აქ მთავარი ცვლილებაა არის ის, რომ ეს პროცესი უნდა იყოს საჯარო. ეს არის მთავარი განმასხვავებელი. როდესაც იუსტიციის უმაღლესი საბჭოს წევრმა იცის, რომ ეს პროცესი ტრანსლირდება, ამას უყურებს ხალხი, სხვანაირი დამოკიდებულება და ვალდებულება ექნება ამ კენჭისყრის მიმართ,“ - განაცხადა გოგორიშვილმა.

დღეს პარლამენტში საერთო სასამართლოების შესახებ კანონპროექტს მეორე მოსმენით განიხილავენ, რომელშიც ვენეციის კომისიის რეკომენდაციები უკვე აისახა. თუმცა ოპოზიციის თქმით, მმართველი გუნდი ცრუობს, როცა ამბობს, რომ პროექტში რეკომენდაციები გაითვალისწინეს. დავის საგანს წარმოადგენს საკითხი, უნდა ჩააბარონ თუ არა გამოცდები უზენაესის მოსამართლეობის კანდიდატებმა. 

საქართველოში უზენაესი სასამართლოს მოსამართლეების შერჩევის საკითხზე ვენეციის კომისიამ დასკვნა 16 აპრილს გამოაქვეყნა. ვენეციის კომისია ხუთ ძირითად რეკომენდაციას გამოყოფს. მათ შორის, უნდა გადაიხედოს არამოსამართლე კანდიდატებისთვის გამოცდის ჩაბარების აუცილებლობა, ხოლო იუსტიციის უმაღლესი საბჭოს წევრი, რომელიც იმავდროულად არის კანდიდატი, გამორიცხული უნდა იყოს კანდიდატების შერჩევა-ნომინირების ყველა პროცედურისგან.