საკონსტიტუციო კომისიის სამუშაო ჯგუფებში მუშაობა დღეს დასრულდება

საკონსტიტუციო კომისიის რამდენიმეთვიანი მუშაობა სამუშაო ჯგუფებში დღეს დასრულდება. ახალი პროექტის გაცნობის შემდეგ კი არასამთავრობოები და ოპოზიციის წევრები კვირის ბოლომდე გადაწყვეტენ, გადადიან თუ არა ბოიკოტის რეჟიმზე. საკონსტიტუციო კომისიის დასკვნით სამუშაო შეხვედრას არასამთავრობო სექტორი დღეს სრული შემადგენლობით დაესწრება, თუმცა სავარაუდოდ,  სწორედ დღესვე დატოვებენ მესამე სექტორის წარმომადგენლები კომისიას. მათი პროტესტის მთავარი მიზეზი საარჩევნო სისტემა, პრეზიდენტის არჩევის წესი და შესაბამისი ვადებია. ბოიკოტს არ გამორიცხავს ოპოზიციაც. ნაციონალური მოძრაობის მსგავსად კომისიის მუშაობა შესაძლოა "ევროპულმა საქართველომაც" დატოვოს. ოპოზიციაში მიაჩნიათ, რომ კონსტიტუცია მხოლოდ მმართველ პარტიას ერგება."ისინი ტოვებენ იმის შესაძლებლობას, რომ საპარლამენტო არჩევნები პროპორციული სისტემით 2024 წელს ჩატარდეს და არა 2020 წელს. თუმცა შესაძლებელია, რომ იმ ზეწოლის შედეგად, რაც მოდის ქართული საზოგადოებიდან და სავარაუდოდ, რა რჩევაც იქნება საერთაშორისო საზოგადოების მხრიდან, მათ მყარად თქვან, რომ პროპორციული სისტემით არჩევნები 2020 წელს ჩატარდეს,"- განაცხადა "ევროპული საქართველოს" წევრმა ზურაბ ჭიაბერაშვილმა. მისივე თქმით, ოპოზიცია დღეს ელოდება საბოლოო პასუხს ამ საკითხზე "ქართული ოცნებისგან".  

კომისიის მუშაობის დასკვნით ეტაპზე პროცესიდან გასვლას მმართველ გუნდში დემარშად აფასებენ. ქართულ ოცნებაში ამბობენ, რომ ოპოზიციისა და არასამთავრობო სექტორის არაერთი ინიციატივა წინასწარ პროექტში უკვე აისახა."არ მახსენდება არცერთი ძირითადი საკითხი, სადაც არ იყო გაზიარებული რომელიმე ჯგუფის მხრიდან შემოთავაზებული უკეთესი ვერსია. ფინალურ ეტაპი არის იმისთვის, რომ ყველა შესაძლო ვერსიას საბოლოოდ ეყაროს კენჭი და დავინახოთ, კომისიის წევრებიდან, ვინ რა პოზიციას ემხრობა. ამ დროს კომისიის დატოვება გაუმართლებელია,"- განაცხადა საპარლამენტო უმრავლესობის წევრმა ეკა ბესელიამ. 

საკონსტიტუციო კომისია 10 აპრილს დატოვა პარტიამ ”სახელმწიფო ხალხისთვის”. 13 აპრილს კი კომისიის მუშაობას "ნაციონალურმა მოძრაობა" გამოეთიშა. მოგვიანებით, "თავისუფალმა დემოკრატებმა" არ გამორიცხეს, რომ მათაც შესაძლოა დატოვონ კომისია. შალვა შავგულიძის განმარტებით, პარტია კონსტიტუციაში შესატანი ცვლილებების საბოლოო პროექტზე პასუხისმგებლობას ვერ აიღებს, თუმცა მისივე განმარტებით, გადაწყვეტილება ჯერ არ მიუღიათ და კომისიაში მუშაობას აგრძელებენ.

საკონსტიტუციო ცვლილებების პროექტის მიღების შემდეგ საყოველთაო სახალხო განხილვები გაიმართება. პარალელურად კი მთავარი კანონის ახალი რედაქციის ვერსია ვენეციის კომისიას გადაეგზავნება.