როგორ შესრულდა ერთი წლის განმავლობაში თამბაქოს მოხმარებაზე რეგულაციები. ანგარიში

საქართველოში საჯარო სივრცეებსა და სხვადასხვა სახის დაწესებულებაში თამბაქოს მოხმარების აკრძალვიდან 1 წელი გავიდა. ამასთან დაკავშირებით, თამბაქოს კონტროლის ალიანსი ერთი წლის შემაჯამებელ ანგარიშს აქვეყნებს.

თამბაქოს კონტროლის ალიანსმა დაავადებათა კონტროლის ცენტრთან თანამშრომლობით 2018 წლის 1 მაისიდან 15 დეკემბრის ჩათვლით საქართველოს მასშტაბით, საზოგადოებრივი კვების 2 103 ობიექტზე ჩაატარა მონიტორინგი. მიღებული მონაცემებით: 97.1% იცავდა მოწევის აკრძალვის რეგულაციას. 

მონიტორინგის ფარგლებში შემოწმდა 488 სასტუმრო, რომელთა 96.9%-ში კანონის მოთხოვნებს იცავდნენ. აღსანიშნავია, რომ ამ ეტაპზე კანონით სასტუმროები ვალდებული არიან, მხოლოდ ნომრების 20% დაეთმოს მწეველ სტუმრებს. 2020 წლიდან სასტუმროებში სრულად აიკრძალება მოწევა. 

ანგარიშში წერია, რომ ჩილიმ-ბარების ერთი ნაწილის მფლობელები, რომლებიც ძირითადად უცხოელები არიან, არ ემორჩილებიან კანონს, მიუხედავად მრავალჯერადი დაჯარიმებისა, ჩილიმს და ზოგიერთ შემთხვევაში თამბაქოს ნაწარმს დახურულ სივრცეებში ეწევიან. 

საბოლოო ჯამში, დახურულ სივრცეში მოწევის აკრძალვის რეგულაცია 95%-ით სრულდება.

თამბაქოს კონტროლთან დაკავშირებით გარკვეული დაწესებულებები და ბიზნესის წარმომადგენლები უკამყოფილებას გამოთქვამდნენ და აცხადებდნენ, რომ თუ აკრძალვა ამოქმედდებოდა, მათ ბიზნეს გაკოტრება ან მოგების შემცირება ემუქრებოდა. ამასთან დაკავშირებით სტატისტიკის ეროვნული სამსახურის მონაცემები ასეთია:

-    საზოგადოებრივი კვებისა და სასმელით მომსახურების სფეროს ბრუნვა 2017 წელს იყო 847.7 მილიონი ლარი,  2018 წელს ბრუნვამ შეადგინა 963.5 მილიონი ლარი. 
-    2017 წელს ამ მიმართულებაში დასაქმებული იყო 21 305 ადამიანი, 2018 წელს კი 22 277 ადამიანი. 
-    რესტორნების, ბარების, კაფეებისა და მსგავსი ობიექტების რაოდენობა 2017 წელს იყო 3990 ობიექტი, 2018 წლის ბოლოს გაიზარდა 1000-ზე მეტით და შეადგინა 5031 ობიექტი. 
-    სასტუმროების ბრუნვა 2017 წელს იყო 110.6 მილიონი ლარი, ხოლო 2018 წელის ბოლოს დაახ. 24 მილიონით მეტი და შეადგინა 134.3 მილიონი ლარი. 
-    ტურისტების საშუალო თვიური რაოდენობა 2017 წელს იყო 863.4 ათასი ადამიანი.  2018 წელს ეს რიცხვი გაიზარდა და შეადგინა მილიონ 20 ათას ხუთასი ტურისტი.

2018 წლის პირველი მაისიდან ასევე აიკრძალა თამბაქოს ნაწარმის რეკლამა და პოპულარიზაცია. 2018 წლის პირველი სექტემბრიდან აიკრძალა თამბაქოს ნაწარმის გამოდება სავაჭრო ობიექტების ვიტრინებში, გარე ფასადზე, ასევე აიკრძალა „დრაივთობაქო“, მანქანიდან გადმოუსვლელად გზისპირა ჯიხურებიდან თამბაქოს ნაწარმის რეალიზაცია.  

-    2018 წლის 1 მაისიდან 15 დეკემბრამდე ჩატარებული მონიტორინგის შედეგად, თამბაქოს ნაწარმის გარე ხილვადობაზე რეგულაცია სავაჭრო ობიექტების 90%-ში სრულდებოდა, პრომო აქციები აიკრძალვა სრულდებოდა 94.2%-ში, ხოლო სავაჭრო ობიექტებში რეკლამის აკრძალვის რეგულაციას იცავდა სავაჭრო ობიექტების 97.5%.

შეგახსენებთ, რომ 2018 წლის 1 მაისიდან თამბაქოს მოწევა აიკრძალა დახურულ შენობებში, მათ შორის ელ. სიგარეტების, გახურებადი თამბაქოს ნაწარმისა და ჩილიმის (მინიმალური გამონაკლისებით).

2018 წლის 1 სექტემბრიდან აიკრძალა სავაჭრო ობიექტის გარე სივრცეში თამბაქოს ნაწარმის გამოდება. თამბაქოს ნაწარმზე პიქტოგრამების დატანის გარეშე რეალიზაცია.