ეკონომიკის ყოფილმა მინისტრმა ქობულიამ თანამდებობიდან წასვლის მიზეზები განმარტა

ეკონომიკის ყოფილმა მინისტრმა გიორგი ქობულიამ თანამდებობიდან გადადგომის მიზეზებზე გადაცემა „ფორბსის კვირაში“ პირველად ისაუბრა. მისი თქმით, სიმართლეა გავრცელებული ინფორმაცია, რომ გადადგომის  შესახებ განცახდების დაწერა სთხოვეს. გიორგი ქობულიამ გადაცემაში მმართველ გუნდთან კონფლიქტის მიზეზებიც განმარტა.  

„იყო თხოვნა, რომ მე წავსულიყავი თანამდებობიდან, მე ეს არ გავაკეთე, რადგან ბოლომდე ვინარჩუნებდი იმედს, რომ იმ ხედვებს, რომელიც მე მიმაჩნდა სწორად მმართველ გუნდს მივუტანდი და ამ ხედვებში მათ დავარწმუნებდი. ეს განცდა და იმედი მქონდა და მაქსიმალურად ვცდილობდი, რომ ეს გამეკეთებინა. როგორც დავინახეთ, ალბათ ბოლომდე არ გამომივიდა“,- განაცხადა ეკონომიკის ყოფილმა მინისტრმა „ფორბსის კვირაში“ საუბრისას. 

ქობულიას თქმით, მას თავიდანვე უნდა გაერკვია ის თამაშის წესები რასაც გუნდი სთავაზობდა: 

„როცა უერთდები გუნდს, უნდა იცოდე, რომ თამაშის წესებით უნდა ითამაშო. მივიღეთ ის, რომ მე ბოლომდე ვერ გავითავისე თამაშის წესები, ან ვერ გავიგე, არ დავხარჯე საკმარისი დრო, რომ ეს გამეგო და მოხდა ის, რომ, , რაც მეგონა დასაწყისში, ეს არ გამართლდა. ამის შემდეგ მოხდა ის კონფლიქტი, რაც მოხდა“- განაცხადა გიორგი ქობულიამ. 

მისივე თქმით, აღნიშნულ თემაზე მას კომუნიკაცია პირველ რიგში პრემიერმინისტრთან ჰქონდა და პარტიის ლიდერთან (ბიძინა ივანიშვილთან) მოხდა აღნიშნული საკითხის დეტალურად გავლა.

გიორგი ქობულაის თქმით, კონფლიქტის მიზეზი იყო გარკვეული გადაწყვეტილებები, რომელსაც პოლიტიკური დატვირთვა ჰქონდა: 

„იყო მთელი რიგი გადაწყვეტილებები, რომლებიც მე მიმაჩნდა უფრო პოლიტიკურად დატვირთული, ვიდრე შედეგზე ორიენტირებული, ასეთ გადაწყვეტილებებს არ ვეთანხმებოდი და არ ვიღებდი. ამავე დროს, ჩემი აზრით, პოლიტიკურადაც, დამაზიანებელი იყო ჩვენთვის, როგორც მმართველი გუნდისთვის. ამაზეც მინდა ვთქვა, რომ ასეთი გადაწყვეტილებები განსაკუთრებით მიუღებელი იყო ჩემთვის. სადაც არც ეკონომიკური შედეგი იყო და ჩემი აზრით, პოლიტიკურადაც დამაზიანებელი იყო. ეს იყო, რა თქმა უნდა, კონფლიქტის ერთ-ერთი მიზეზი. არსებობდა მთელი რიგი გადაწყვეტილებები, რომლებიც მე სწორად, მართებულად მიმაჩნდა და რომელთა მიღებაც მიჭირდა, იმიტომ, რომ საკმარისი მხარდაჭერა არ მქონდა“- განაცხადა გიორგი ქობულაიმ. 

გიორგი ქობულიას განცხადებით, მისთვის გასაკვირი იყო, როდესაც მას მმართველი გუნდიდან არ იცავდნენ, როდესაც თანამდებობაზე დანიშვნის პირველ ეტაპზე საქართველოში არყოფნის გამო აკრიტიკებდნენ. 

მას როგორც პრემიერ-მინისტრთან, ასევე პარტიის ლიდერთან შეთანხმება მიღწეული ჰქონდა, რომ სრულფასოვან მუშაობას სექტემბერში დაიწყებდა.

ეკონომიკის მინისტრმა გიორგი ქობულიამ თანამდებობა პრემიერმინისტრის ბრძანებით დატოვა. ის თანამდებობიდან 2019 წლის 18 აპრილს გადადგა. ეკონომიკის მინისტრად ნათია თურნავა დაინიშნა.  

„თუ რომელიმე მინისტრი იმ ტემპს ჩამორჩება, რაც აუცილებელია იმისთვის, რომ შეპირებული შედეგი ვაჩვენოთ, ბუნებრივია ცვლილება არ დააყოვნებს“ - განაცხადა საქართველოს პრემიერმინისტრმა მამუკა ბახტაძემ. 

გიორგი ქობულია ეკონომიკის მინისტრად 2018 წლის 12 ივლისს დაინიშნა, მანამდე კი ბიზნესის სფეროში საქმიანობდა. გიორგი ქობულია ეკონომიკის მინისტრის თანამდებობას ათი თვის განმავლობაში იკავებდა.