ზუგდიდის საკრებულოში ოპოზიციასა და უმრავლესობას შორის დაპირისპირება მოხდა

ზუგდიდის საკრებულოში გაერთიანებული ოპოზიციის წარმომადგენლები და უმრავლესობის დეპუტატები ერთმანეთს სიტყვიერად და ფიზიკურად დაუპირისპირდნენ. სხდომაზე სანდრა რულოვსი და „ენმ“-ს წარმომადგენლები მივიდნენ და დეპუტატებისგან ზუგდიდში, დადიანების სასახლის ეზოსა და სოფელ ჯიხაშკარში მომხდარი ინციდენტების განხილვა მოითხოვეს.

უმრავლესობის წევრმა ირაკლი ლაგვილავამ სანდრა რულოვსს უთხრა, რომ მას არ აქვს მორალური უფლება, ზვიად გამსახურდიას დარბაზში ხმამაღლა ისაუბროს. სწორედ ლაგვილავას სიტყვით გამოსვლას მოჰყვა ხმაური და დაპირისპირება.

საკრებულოს თავმჯდომარის მამუკა წოწერიას მტკიცებით, „ნაციონალურ მოძრაობას“ ზუგდიდში არჩევნები წაგებული აქვს და ახლა პროვოკაციაზე გადავიდნენ.

საკრებულოში დაპირისპირება დადიანების სასახლის ეზოში მომხდარ ინციდენტს უკავშირდება. კერძოდ, სანდრა რულოვსის ოფიციალურ Facebook-ზე ვრცელდება ვიდეო, სადაც ფიზიკური დაპირისპირება ჩანს კადრებში.

„დღეს დილით ვიმყოფებოდით ზუგდიდში, დადიანების სასახლის ეზოში. აქვე იყო ტელეკომპანია ოდიშის გადამღები ჯგუფი. უნდა ჩაგვეწერა არაპოლიტიკური გადაცემა. ჩემთან ერთად უნდა ესაუბრათ ნიკა ვაჩეიშვილს და ბაჩანა შენგელიას. ამ დროს თავს დაგვესხა "ოცნების" ზონდერების ჯგუფი. იყვნენ ძალიან აგრესიულები, გვაყენებდნენ სიტყვიერ შეურაცხყოფას, გვიწვევდნენ ფიზიკურ დაპირისპირებაში. ისინი ფიზიკურად დაესხნენ თავს ჩვენი ჯგუფის რამდენიმე წარმომადგენელს, მათ შორის ჟურნალისტებს. ჩვენ არ ავყევით ამ პროვოკაციას. გამოვიძახეთ პოლიცია, რომელიც მოვიდა დაგვიანებით, მას მერე, რაც ზონდერებმა დატოვეს ტერიტორია. ჩვენ მოვითხოვთ ამ დანაშაულზე ადეკვატურ სამართლებრივ რეაგირებას და დამნაშავეების დასჯას. ასეთები არცხვენენ ზუგდიდს და არცხვენენ საქართველოს“, - წერს რულოვსი.

აღნიშნულთან დაკავშირებით კომენტარი გააკეთა შინაგან საქმეთა მინისტრმა გიორგი გახარიამ და აღნიშნა, რომ ყველა შემთხვევას დეტალურად გამოიძიებენ. „შსს-სთვის არ აქვს მნიშვნელობა, რომელი მხარე იქნება დამნაშავე“, - განმარტა მინისტრმა.