გაფიცული მაღაროელების საქმეზე პარლამენტში ეკონომიკის მინისტრს და კომპანიის დროებით მმართველს იბარებენ

ჭიათურაში გაფიცულ მაღაროელებთან დაკავშირებით პარლამენტში ეკონომიკის მინისტრს, ნათია თურნავას და ჯორჯიან მანგანეზის“ დროებით მმართველს იბარებენ. ამის შესახებ განცხადება ბრიფინგზე დეპუტატმა ბექა ნაცვლიშვილმა გააკეთა.

მისი თქმით, ეს საკითხი დარგობრივი ეკონომიკის კომიტეტის სხდომაზე დღეს დადგება. როგორც დეპუტატმა თქვა, ის ჭიათურელ მაღაროელებს შეხვდა, ამ საკითხთან დაკავშირებით კი პარლამენტმა რეაგირება "აუცილებლად უნდა მოახდინოს". 

"ვითხოვთ, „ჯორჯიან მანგანეზის“ დროებითი მმართველი ნიკოლოზ ჩიქოვანი ხვალ აუცილებლად გამოცხადდეს პარლამენტში და მოგვცეს ინფორმაცია, რამ გამოიწვია ეს ვითარება, რამ მიიყვანა მაღაროელები პროტესტის უკიდურეს ფორმამდე. ამ მოთხოვნას უერთდებიან „პატრიოტთა ალიანსი - სოციალ დემოკრატები“. დღეს ჩვენ დავაყენებთ საკითხს დარგობრივი კომიტეტის სხდომაზე, რომ გარდა ნიკოლოზ ჩიქოვანისა, პარლამენტში ასევე მოვიდეს ეკონომიკის მინისტრი და გაგვაცნოს სამთო მომპოვებელ სფეროში არსებულ მდგომარეობასთან დაკავშირებით ვითარება", - განაცხადა ბექა ნაცვლიშვილმა. 

ამ საკითხთან დაკავშირებით დღეს კომენტარი გააკეთა სახალხო დამცველმა ნინო ლომჯარიამ. მისი თქმით, შეიძლება სახალხო დამცველს, ან სახელმწიფოს ძლიერი ბერკეტები არ ჰქონდეს, თუმცა მისი აზრით, სახელმწიფო ამ საკითხის მოგვარებაში უფრო ეფექტურად უნდა ჩაერთოს. 

"მე მრჩება განცდა, რომ დიალოგის რესურსი საწარმოს და გაფიცულ მუშებს შორის არის ამოწურული. ასევე მუშები აცხადებენ, რომ მათ გარკვეული ნდობა სახელმწიფო ინსტიტუტების მიმართ გააჩნიათ, ამიტომ მიმაჩნია, რომ ამ შემთხვევაში სახელმწიფომ უნდა აიღოს თავის თავზე პასუხისმგებლობა, რომ კომუნიკაციის და კომპრომისის რესურსები გაჩნდეს. სახალხო დამცველი არის მზად იმისათვის, რომ ამ პროცესში მიიღოს მონაწილეობა, ზედამხედველობა გაუწიოს, თუნდაც როგორ წარიმართება ეს კომუნიკაცია იმისათვის, რომ მაქსიმალურად იყოს დაცული შრომითი უფლებები. ჩვენ, რა თქმა უნდა, მხარს ვუჭერთ ამ ადამიანების მოთხოვნებს", - განაცხადა ნინო ლომჯარიამ. 

ჭიათურაში უშედეგოდ დასრულებული მოლაპარაკების შემდეგ მაღაროელთა პროტესტი გრძელდება. აქციის მონაწილეებს სკოლის მოსწავლეები, ბაზრობისა და მაღაზიების თანამშრომლები და მოსახლეობის ნაწილი სოლიდარობის ნიშნად შეუერთდა. 

ჭიათურაში მაღაროელები 16 მაისს გაიფიცნენ. პროტესტის მეცხრე დღეს ჭიათურელ მაღაროელებს ტყიბულელი მეშახტეები შეუერთდნენ. 40-მდე მეშახტემ გაფიცულებს სოლიდარობა გამოუცხადა.

24 მაისს მაღაროელებს ჭიათურის მერმა იურიდიული დახმარება შესთავაზა. გაფიცულების ინფორმაციით, ახლად არჩეული მერის გადაწყვეტილებით, მათ იურისტი ეყოლებათ, რომელიც მიმდინარე პროცესებში კონსულტაციას გაუწევთ და დაეხმარებათ. საქმეში ჩაერთო სახალხო დამცველიც. 

აქციიდან მე-11 დღეს, ჭიათურაში 15 მაღაროელი შიმშილობს, სამს პირი აქვს ამოკერილი და ასობით გაფიცულია. ყველა მაღაროში საწარმოო პროცესი შეჩერებულია.