ზურაბიშვილი: შრომის საერთაშორისო ორგანიზაციის საქართველოსთან თანამშრომლობა მოსკოვის ოფისიდან არ უნდა ხორციელდებოდეს

საქართველოს პრეზიდენტი შრომის საერთაშორისო ორგანიზაციის საუბილეო კონფერენციაში მონაწილეობს. სალომე ზურაბიშვილი დელეგატების წინაშე სიტყვით გამოვიდა. პრეზიდენტმა ისაუბრა შრომის კანონმდებლობაზე, დასაქმების კუთხით არსებულ პრობლემატიკაზე, რეფორმებზე და ცირკულარული მიგრაციის მნიშვნელობაზე საქართველოსთვის.

კონფერენციაში, რომელიც ორგანიზაციის დაარსების 100 წლისთავს ეძღვნება, 40 ქვეყნის ლიდერები და 190-მდე ქვეყნის 5000 დელეგატი მონაწილეობს.

საქართველოს პრეზიდენტმა შრომის საერთაშორისო ორგანიზაციის გენერალურ დირექტორთან შეხვედრისას საკითხი დააყენა, რომ  შრომის საერთაშორისო ორგანიზაციის საქართველოსთან რეგიონული თანამშრომლობა არ ხორციელდებოდეს ორგანიზაციის მოსკოვის რეგიონული ოფისიდან, გამომდინარე იქიდან, რომ საქართველოს ევროკავშირის ასოცირებული წევრის სტატუსი აქვს და არ არის დსთ- ს წევრი ქვეყანა.

საქართველოს პრეზიდენტის განცხადებით, არანაირი არგუმენტი არ არსებობს იმისა, რომ საქართველო შრომის საერთაშორისო ორგანიზაციის მოსკოვის ბიუროდან იფარებოდეს, რომელიც დსთ-ს წევრ ქვეყნებს ფარავს.

პრეზიდენტის ინიციატივაა, რომ საქართველო ბუდაპეშტში არსებული ცენტრალური  და აღმოსავლეთ ევროპის ბიუროდან დაიფაროს.

აღნიშნული განცხადება სალომე ზურაბიშვილმა ჟენევაში, გაეროს ოფისში, შრომის საერთაშორისო კონფერენციის დაწყებამდე შრომის საერთაშორისო ორგანიზაციის გენერალურ დირექტორთან გაი რაიდერთან შეხვედრისას გააკეთა.

საუბარი შეეხო ევროკავშირის კუთხით შრომით საკითხებთან დაკავშირებულ თემებს, შრომითი მიმართულებით ევროპული ფასეულობების დანერგვისა და განვითარების საკითხებს.

საქართველოს პრეზიდენტმა ოკუპირებულ ტერიტორიებზე არსებულ ვითარებაზე ისაუბრა და აღნიშნა, რომ სამწუხაროა, როცა საქართველოს ოკუპირებულ ტერიტორიებზე მცხოვრები მოსახლეობა ვერ სარგებლობს იმ რეფორმების შედეგებითა და სიკეთეებით, რასაც საქართველო ახორციელებს. მხარეებმა შეხვედრის შემდეგ საჩუქრები გაცვალეს.

საქართველოს დელეგაციას ორგანიზაციის გენერალური დირექტორმა ოფიციალურ მიღებაზე უმასპინძლა, რომელიც უმაღლესი დონის დელეგაციებისათვის გაიმართა.