Freedom House-ის წარმომადგენელი: გასაკვირი არაა, რომ ქართულ მედიაში გაბუნიას მსგავსი ინციდენტები არსებობს

Freedom House-ის წარმომადგენელი ჟურნალისტ გიორგი გაბუნიას მონოლოგს და გამოხმაურებებს აფასებს. ევროპისა და ევრაზიის პროგრამების დირექტორი მარკ ბერენტი „ამერიკის ხმასთან“ საუბარში ამბობს, რომ თუკი გამოხატვის თავისუფლება აძლევს გაბუნიას საშუალებას გააკეთოს ასეთი არაპროფესიონალური კომენტარი, მაშინ ის ასევე აძლევს საშუალებას პოლიტიკოსებს და საზოგადოებას, ჰქონდეთ თუნდაც მკაცრი რეაქცია.

კითხვაზე, ხედავს თუ არა გამოხატვის თავისუფლების შეზღუდვის ნიშნებს ხელისუფლების გამოხმაურებებში, მარკ ბერენტი აცხადებს, რომ ვერ ხედავს, რომ გამოხატვის თავისუფლება ამით შეიზღუდა.  

„საქართველოში ერთ-ერთი ყველაზე თავისუფალი მედია გარემოა. პრობლემა ხელისუფლების მხრიდან მედიის ცენზურა არაა, პრობლემა ისაა, რომ მედია გამოცემებმა საკუთარ თავს უფლება მისცეს გამხდარიყვნენ სხვადასხვა პარტიის წარმომადგენლები. ჟურნალისტებმა საკუთარ თავს უფლება მისცეს, რომ მედია გამოცემებისა და მათი მფლობელების ზეგავლენის ქვეშ მოქცეულიყვნენ. გასაკვირი არაა, რომ ქართულ მედიაში გაბუნიას მსგავსი ინციდენტები არსებობს, გასაკვირი ის იქნებოდა, რომ ჟურნალისტს გადაეხვია იმ ხაზიდან, რომელიც მედია საშუალებას აქვს, მიუხედავად იმ ტონისა, რასაც ისინი იყენებენ“, - ამბობს მარკ ბერენტი. 

რაც შეხება იმას, როგორ შეაფასებდა რუსეთის რეაქციას გაბუნიას განცხადებაზე, მარკ ბერენტი აცხადებს, რომ რუსეთის განცხადება გაბუნიას სამართლებრივ დევნაზე აღმაშფოთებელია.

ტელეკომპანია „რუსთავი 2“-ის პირდაპირ ეთერში, გადაცემა „P.S“-ის წამყვანმა, გიორგი გაბუნიამ რუსეთის პრეზიდენტს ვლადიმერ პუტინს რუსულად არაეთიკურად მიმართა, რასაც მოქალაქეების ნაწილის გაღიზიანება და აქცია მოჰყვა.

"რუსთავი 2"-ის პირდაპირი ეთერიდან წამყვანის მიერ წარმოთქმულ სიტყვებთან დაკავშირებით, განცხადება გაავრცელა საქართველოს ჟურნალისტური ეთიკის ქარტიამაც.

გაბუნიას მონოლოგი გააკრიტიკა არხის გენერალურმა დირექტორმა ნიკა გვარამიამაც და გადაწყდა, რომ გაბუნია 2 თვე გადაცემებს აღარ წაიყვანს.