უცხოელი დიპლომატები რუსეთ-საქართველოს ომის მე-11 წლისთავს ეხმიანებიან

ამერიკელი და ევროპელი დიპლომატები 2008 წლის აგვისტოს ომს იხსენებენ. აშშ-ის სახელმწიფო მდივნის ყოფილი მრჩეველი პოლ გობლი Imedinews-თან აცხადებს, რომ საქართველოს მიმართ აგრესიას პუტინი აფხაზებისა და ოსების თვითგამორკვევის უფლების დაცვით ხსნიდა.

„თუმცა ბოლო 10 წელიწადში მთელმა სამყარომ დაინახა რომ ეს პროპაგანდა იყო, ხოლო ამ ორმა ერმა დაინახა, რომ რუსების მიერ „გათავისუფლება“ რეალურად „დაპყრობას" ნიშნავს“, - განაცხადა პოლ გობლმა. 

აშშ-ის სახელმწიფო მდივნის მოადგილის ყოფილი თანაშემწე მეთიუ ბრაიზა, რომელიც იმ პერიოდში კონდოლიზა რაისის დავალებით საქართველოს სტუმრობდა, Imedinews-სთან აცხადებს, რომ ტრანსატლანტიკურმა საზოგადოებამ საქართველოს ტერიტორიებიდან რუსეთის ჯარის გასაყვანად მოსკოვზე საკმარისი ზეწოლა ვერ განახორციელა და ეს უუნარობა მორალური და სტრატეგიული მარცხია. 

ბრაიზა იმედოვნებს, რომ ევროპა და აშშ ამ მტკივნეულ გაკვეთილებზე ისწავლის, მიუხედავად იმისა, რომ ახლა ძალიან გვიანია. 

„დღეს ყველამ ერთად უნდა იმუშაოს იმაზე, რომ საქართველომ ტერიტორიული მთლიანობა და სუვერენიტეტი აღიდგინოს“, - ეს განცხადება კი აშშ-ის სახელმწიფო მდივნის მეორე მოადგილეს კავკასიისა და აღმოსავლეთ ევროპის საკითხებში ჯორჯ კენტს ეკუთვნის. 

„2008 წელს რუსეთის შეჭრამ საქართველოში დაანგრია ილუზიები, რომ 21-ე საუკუნის გეოპოლიტიკური მოქმედება გაეროს უსაფრთხოების საბჭოს ნორმების, ევროპის თუ ეუთოს, ჰელსინკის აქტის პრინციპების მიხედვით წარიმართებოდა. ქვეყანა მისი მეზობლის ტერიტორიაზე შეიჭრა, ყველანაირი წინაპირობის გარეშე, დაიკავა და აგრძელებს მისი ტერიტორიის ოკუპაციას“, - თქვა ამერიკელმა დიპლომატმა, რომლის კომენტარს „ამერიკის ხმა“ ავრცელებს. 

რუსეთს 2008 წლის 6 პუნქტიაში სამშვიდობო შეთანხმების დაცვისკენ მოუწოდებს შვედეთის საგარეო საქმეთა მინისტრი მარგო ვოლსტრომი, რომელიც აქვე საქართველოს ტერიტორიული მთლიანობის მხარდაჭერას ადასტურებს.

„რუსეთის სამხედრო ძალების ყოფნა აფხაზეთსა და სამხრეთ ოსეთში უხეშად არღვევს საერთაშორის შეთანხმებას. მოვუწოდებთ რუსეთს დაიცვას 2008 წლის 6 პუნქტიაში სამშვიდობო შეთანხმება“, - წერს შვედი დიპლომატი Twitter-ზე. 

Today marks 11 years since Russia’s invasion of Georgia. Sweden remains staunch supporter of Georgia’s sovereignty & territorial integrity. Russian military presence in Abkhazia & South Ossetia continues in violation of int. law. Call on Russia to implement Six Point Plan of 2008

— Margot Wallström (@margotwallstrom) August 7, 2019

11 წლის წინ, რუსეთმა საქართველოს წინააღმდეგ სამხედრო აგრესია დაიწყო, - ასე ეხმაურება ესტონეთის საგარეო საქმეთა მინისტრი ურმას რეინსალი 2008 წლის ომის 11 წლისთავს.„2008 წლის ცეცხლის შეწყვეტის შეთანხმების მიუხედავად ოკუპირებულ აფხაზეთსა და სამხრეთ ოსეთში რუსი სამხედროების რიცხვი იზრდება. ოკუპირებულ ტერიტორიაზე რუსეთის მხრიდან ირღვევა ადამიანის უფლებები და დაუცველია საერთაშორისო ნორმები“, - აღნიშნულია მინისტრის Twitter-ის საკუთარ გვერდზე გამოქვეყნებულ პოსტში.

Today 11 years ago, Russia started its military aggression against #Georgia. Despite the 2008 ceasefire agreement, 🇷🇺 has increased military presence in occupied Abkhazia and South Ossetia, gross violation of human rights continues. International law must be followed. https://t.co/mVRD41K0AL

— Urmas Reinsalu (@UrmasReinsalu) August 8, 2019

2008 წლის აგვისტოს რუსეთ-საქართველოს ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა. 

ჯანდაცვის სამინისტროს მონაცემებით, დაჭრილ-დაშავებულ სამოქალაქო და სამხედრო პირთა რაოდენობა სულ 2 232-ია. მათ შორის, 1045 სამხედრო მოსამსახურე იყო.