საქართველოს მიმართ რუსეთის აგრესიული ქმედება და ოკუპაცია გაეროშიც დაგმეს

რუსეთის აგრესიული ქმედება და ოკუპაცია საქართველოს მიმართ გაეროშიც დაგმეს. გაეროსთან საქართველოს მუდმივმა წარმომადგენელმა კახა იმნაძემ დღეს აღნიშნულთან დაკავშირებით ბრიფინგი ჩაატარა და გაეროს წევრი სახელმწიფოების წარმომადგენლებს 11 წლის წინანდელი მოვლენები ქრონოლოგიურად წარუდგინა. ამავდროულად, აღნიშნა, რომ საერთაშორისო სამართლის ფუნდამენტური ნორმების სრული უგულებელყოფით 11 წლის წინ რუსეთმა სამხედრო აგრესია განახორციელა სუვერენული სახელმწიფოს საზღვრების ძალისმიერი გზით შეცვლის მცდელობისთვის, რამაც სერიოზული საფრთხე შეუქმნა რეგიონისა და მთლიანად ევროპული უსაფრთხოების სისტემას. 

იმნაძემ აღნიშნა ისიც, რომ რუსეთის ფედერაციას ჯერ კიდევ არ აქვს შესრულებული ევროკავშირის შუამდგომლობით 2008 წლის 12 აგვისტოს დადებული ცეცხლის შეწყვეტის შესახებ შეთანხმება და აგრძელებს საერთაშორისო ვალდებულებების დარღვევას. უფრო აძლიერებს თავის უკანონო სამხედრო ყოფნას ადგილზე და ხელს უშლის უსაფრთხოების საერთაშორისო მექანიზმების შექმნას საქართველოს აფხაზეთისა და ცხინვალის რეგიონებში. „რუსეთი დგამს ნაბიჯებს საქართველოს აფხაზეთისა და ცხინვალის რეგიონების დე-ფაქტო ანექსიის მიმართულებით და ცდილობს, ოკუპირებულ ტერიტორიებზე მცხოვრები მოსახლეობა დანარჩენი საქართველოსგან იზოლაციაში მოაქციოს. ამ მიზნით, კი რუსეთი მიზანმიმართულად აგრძელებს საოკუპაციო ხაზზე მავთულხლართებისა და ხელოვნური ბარიერების აღმართვას, ე.წ გადასასვლელი პუნქტების დახურვას, თავისუფალი გადაადგილების შეზღუდვას, ადგილობრივი მოსახლეობის გატაცებისა და უკანონო დაკავების პრაქტიკას“, - განმარტა ელჩმა. 

საქართველო კი, როგორც ელჩმა აღნიშნა,  განაგრძობს კონფლიქტის მშვიდობიანი მოგვარების პოლიტიკას დიალოგისა და ჟენევის საერთაშორისო მოლაპარაკებებში კონსტრუქციული ჩართულობის გზით. ერთ-ერთ ნაბიჯად კახა იმნაძემ სამშვიდობო ინიციატივა - „ნაბიჯი უკეთესი მომავლისაკენ“ წარმოადგინა, რომელმაც გაეროს წევრი სახელმწიფოების წარმომადგენლების მოწონება დაიმსახურა. 

ასევე, დღეს ამერიკელმა და ევროპელმა დიპლომატებმა 2008 წლის აგვისტოს ომი გაიხსენეს.

2008 წლის აგვისტოს რუსეთ-საქართველოს ომში საქართველოს თავდაცვის სამინისტროს 170 მოსამსახურე, შინაგან საქმეთა სამინისტროს 14 თანამშრომელი და 224 სამოქალაქო პირი დაიღუპა. 

ჯანდაცვის სამინისტროს მონაცემებით, დაჭრილ-დაშავებულ სამოქალაქო და სამხედრო პირთა რაოდენობა სულ 2 232-ია. მათ შორის, 1045 სამხედრო მოსამსახურე იყო.