პარლამენტთან მოძრაობა „სირცხვილიას“ საპროტესტო აქცია განახლდა

საქართველოს პარლამენტის შენობის წინ მოძრაობა „სირცხვილიას“ საპროტესტო აქცია განახლდა. აქციაზე არიან ოპოზიციის წარმომადგენლები, მათ შორის „ევროპული საქართველოდან“ და „ნაციონალური მოძრაობიდან“. 

აქციის ორგანიზატორები და მხარდამჭერები პრემიერმინისტრად გიორგი გახარიას კანდიდატურის დასახელებას აპროტესტებენ. ორგანიზატორების თქმით, ყველაფერს გააკეთებენ, რომ მთავრობის მეთაურად გიორგი გახარიას დანიშვნას ხელი შეუშალონ.

ამასთან, პარლამენტთან არსებულ სკვერში აქცია „სირცხვილიას“ ორგანიზატორებისა და „ნაციონალური მოძრაობის“ ოპოზიციური ჯგუფის წარმომადგენელთა დაპირისპირების შესახებ ახალი დეტალები გახდა ცნობილი. აქციის ორგანიზატორები დღევანდელ შეკრებაზე გრიგოლ ვაშაძის შესაძლო სიტყვით გამოსვლას აპროტესტებდნენ. „მაესტროს“ ინფორმაციით, გრიგოლ ვაშაძე იმ ე.წ. პოლიტიკოსების შავ სიაშია, ვისაც აქციებზე ტრიბუნიდან მიმართვის საშუალება არ უნდა მიეცეს.

„უკვე 76 დღის განმავლობაში ყველა პოლიტიკურ პარტიას ჰყავს თავისი სპიკერი და ის ადამიანები, რომლის ბიც იხილეთ ჩვენს პოლიტიკურ სცენაზე პოლიტიკური პარტიებიდან, მოახერხებენ, რომ შემდგომში ნებისმიერ დროს შესაბამისი რაოდენობით ჩვენს სცენაზე გამოვიდნენ. როგორც მაქვს ინფორმაცია, გრიგოლ ვაშაძე არ იყო იმ ადამიანებს შორის, ვინც გვყავდა გამომსვლელთა სიაში. ჩვენ ვთამაშობთ იმ წესებით, რომელზეც ყველასთან შევთანხმდით“,- განაცხადა ნოდარ რუხაძემ.

„ევროპული საქართველოს“ ლიდერებიც მოძრაობა „სირცხვილიას“ ორგანიზატორებს ნაწილობრივ ეთანხმებიან და მიაჩნიათ, რომ პროტესტი ახალგაზრდების მიერ არის ორგანიზებული და მათ უნდა გადაწყვიტონ ვინ გამოვა ტრიბუნაზე და ვინ ვერა. აკაკი ბობოხიძე ამბობს, რომ „თბილისი დიდი ქალაქია და თუ ვინმეს პროტესტის გამოხატვა სურს, აქციის სხვა ადგილზე ჩატარების საშუალებაც აქვს“.

პარლამენტთან მობილიზებულია საპატრულო პოლიცია. რუსთაველის გამზირზე საავტომობილო მოძრაობა ამ დროისთვის შეფერხებული არ არის.

პრემიერმინისტრის პოსტზე გიორგი გახარიას კანდიდატურა 3 სექტემბერს, პოლიტსაბჭოს სხდომის დასრულების შემდეგ პარტიის თავმჯდომარემ ბიძინა ივანიშვილმა წარადგინა. საქართველოს შინაგან საქმეთა მინისტრად ვახტანგ გომელაური, თავდაცვის მინისტრად კი ირაკლი ღარიბაშვილი არიან წარდგენილი. 

რაც შეეხება თავდაცვის ყოფილ მინისტრ ლევან იზორიას, ის უსაფრთხოების საბჭოს მდივნის თანამდებობაზე დასახელდა.

გიორგი გახარიას გადადგომის მოთხოვნით რამდენიმე თვის მანძილზე მოსახლეობის ნაწილი რუსთაველის გამზირზე საპროტესტო აქციებს მართავდა.

20 ივნისს პარლამენტთან მშვიდობიანი აქციის შემდეგ, მომიტინგეების ნაწილმა შენობაში შეჭრა შტურმით სცადა. სპეცრაზმმა აქციის დაშლა დაიწყო და რამდენჯერმე გამოიყენა ცრემლმდენი გაზი, წყლის ჭავლი და რეზინის ტყვიები. შედეგად საავადმყოფოში გადაიყვანეს 240 ადამიანი, მათგან 80 სამართალდამცველი, 4 ადამიანს თვალი დაუზიანდა, ერთმა მოქალაქემ და ერთმა სამართალდამცველმა კი თვალი დაკარგა.

რუსთაველის გამზირზე საპროტესტო აქციები მას შემდეგ დაიწყო, რაც პარლამენტის თავმჯდომარისთვის განკუთვნილი ადგილიდან მართლმადიდებლური საპარლამენტთაშორისო ასამბლეის წევრებს სიტყვით რუსეთის დუმის კომუნისტური პარტიის წევრმა სერგეი გავრილოვმა მიმართა. ამ ფაქტს საპროტესტო აქციების ტალღა და პარლამენტის თავმჯდომარის, ირაკლი კობახიძის გადადგომა მოჰყვა. 

20-21 ივნისის აქციების საქმის გამოძიების დასრულებამდე შსს-ს განსაკუთრებულ დავალებათა დეპარტამენტის უფროსს უფლებამოსილება შეუჩერდა.