დავით ზალკალიანი სერგეი ლავროვს შეხვდა

რამდენიმეწლიანი პაუზის შემდეგ, ნიუ-იორკში, რუსეთის და საქართველოს პირველი დიპლომატები ერთმანეთს შეხვდნენ. 

საგარეო უწყებამ Imedinews-ს დაუდასტურა, რომ შვეიცარიის ინიციატივით და ორგანიზებით, გაეროს გენერალური ასამბლეის 74-ე სესიის ფარგლებში, საქართველოს საგარეო საქმეთა მინისტრის და რუსეთის ფედერაციის საგარეო საქმეთა მინისტრის შეხვედრა გაიმართა. შეხვედრაზე ქართული მხრიდან განხილვის მთავარი თემა საქართველოს ტერიტორიების ოკუპაციის საკითხი იყო.

„შეხვედრაზე ქართული მხარის მიერ დაისვა საქართველოს ტერიტორიების დეოკუპაციის საკითხი, საუბარი შეეხო არსებული უსაფრთხოების გარემოსა და ოკუპირებულ ტერიტორიებზე განვითარებულ პროცესებს, ასევე, საქართველო-რუსეთის ურთიერთობებში არსებულ პრობლემურ საკითხებს“, - აღნიშნულია საგარეო უწყების ინფორმაციაში.

ინფორმაცია შვეიცარიის საელჩომაც გაავრცელა: 

#Switzerland facilitated a meeting between Georgia & Russia today on the margins of #UNGA 🇨🇭has a long-standing tradition in fostering dialogue. 🇨🇭has been representing the interests of Russia in Tbilisi & the interests of Georgia in Moscow since 2009. https://t.co/2Agd6vjZZ2

— Swiss Embassy (@SwissEmbassyUSA) September 26, 2019

„შვეიცარიის შუამავლობით და ინიცირებით შედგა შეხვედრა საქართველოს საგარეო საქმეთა მინისტრს, დავით ზალკალიანსა და  რუსეთის ფედერაციის საგარეო საქმეთა მინისტრს, სერგეი ლავროვს შორის. შეხვედრა გაიმართა გაერთიანებული ერების ორგანიზაციის გენერალური ასამბლეის ფარგლებში, ნიუ-იორკში, 2019 წლის 26 სექტემბერს. შვეიცარიას დიალოგის ხელშეწყობის მიმართულებით დიდი ხნის გამოცდილება აქვს. 2009 წლის მარტიდან, ის წარმოადგენს რუსეთის ინტერესებს თბილისში და საქართველოს ინტერესებს მოსკოვში“. 

რუსეთის საგარეო საქმეთა სამინისტროს ინფორმაციით კი, „შეხვედრა შედგა შვეიცარიის შუამავლობით, რომელიც მოსკოვსა და თბილისს შორის დიპლომატიური ურთიერთობების არარსებობის პირობებში რუსეთის ინტერესებს საქართველოში, საქართველოს ინტერესებს კი რუსეთში წარადგენს”.

რუსეთის საგარეო უწყების ცნობით, შეხვედრის მიმდინარეობისას, საუბარი შეეხო ორმხრივი დღის წესრიგის აქტუალურ საკითხებს. „შედგა საუბარი რეგიონულ უსაფრთხოებასთან დაკავშირებულ პრობლემატიკაზე“. 

საქართველოს დელეგაცია გაეროში პრეზიდენტ სალომე ზურაბიშვილის ხელმძღვანელობით, გენერალური ასამბლეის 74-ე სესიაში მონაწილეობს. დელეგაციის შემადგენლობაშია საგარეო საქმეთა მინისტრი დავით ზალკალიანი.

2008 წლის აგვისტოს ომისა და რუსეთის მიერ ოკუპირებული ტერიტორიების „აღიარების“ შემდეგ, საქართველომ რუსეთის ფედერაციასთან დიპლომატიური ურთიერთობები (02.09.2008 წ.) გაწყვიტა. 

2009 წლის მარტში საქართველოში შვეიცარიის საელჩოს რუსეთის ფედერაციის ინტერესების სექცია და რუსეთის ფედერაციაში შვეიცარიის საელჩოს საქართველოს ინტერესების სექცია გაიხსნა.