პირველ ოქტომბერს დაჯარიმებულ ტაქსის მძღოლებს ჯარიმები მოეხსნებათ

„პირველ ოქტომბერს დაჯარიმებული ტაქსის მძღოლები ჯარიმებისგან გათავისუფლდებიან“, - ამის შესახებ მედიასთან განცხადება ფრაქცია „ქართული ოცნების“ თავმჯდომარემ მამუკა მდინარაძემ გააკეთა. ჯარიმებს ერთჯერადი საკანონმდებლო აქტით ჩამოწერენ. 

მამუკა მდინარაძის ინფორმაციით, პატრულთან კომუნიკაციის შედეგად მიღებული ინფორმაციის თანხმად, საუბარია 700-ზე მეტ დაჯარიმებულ მძღოლზე.

„რეფორმა პირველი ოქტომბრიდან ამოქმედდა. იმის გამო, რომ გარვკეულმა ჯგუფებმა არასწორი მოლოდინების გაჩენა შეძლეს და შეცდომაში შეიყვანეს ტაქსის მძღოლები პირველ ოქტომბერთან დაკავშირებით, მათ ეგონათ, რომ პირველ ოქტომბერს არ დაჯარიმდებოდნენ და ე.წ. საშეღავათო პერიოდი პირველ ოქტომბრამდე იყო. ამის გამო, ეს ადამიანები ქალაქში გამოვიდნენ და პატრულმა 200-ლარიანი ჯარიმებით დააჯარიმათ. გადავწყვიტეთ, ამ გაურკვევლობის აღმოსაფხვრელად და ფინანსური ჯარიმის მოსახსნელად ქალაქის მერთან, პარლამენტის თავმჯდომარესთან და უმრავლესობასთან შეთანხმებით, დავაინიციროთ საკანონმდებლო ერთჯერადი აქტი, რომლის მიხედვითაც, ჯარიმები მოეხსნებათ ტაქსის იმ მძღოლებს, ვინც პირველ ოქტომბერს დაჯარიმდა“, – განაცხადა მამუკა მდინარაძემ.

რეგულაციების დარღვევის გამო ტაქსის მძღოლები 200 ლარით დააჯარიმეს. 

„ტაქსების დაახლოებით 30-მა პროცენტმა ვერ დააკმაყოფილა მინიმალური სტანდარტი, რაც საჭიროა მგზავრთა გადაყვანისთვის,“- ამის შესახებ თბილისის მერმა კახა კალაძემ დედაქალაქის მთავრობის სხდომაზე 2 ოქტომბერს განაცხადა. 

ტაქსების რეფორმის მეორე ეტაპი, რომელიც ტაქსების A და B კატეგორიებად დაყოფას ითვალისწინებს, პირველ ოქტომბერს ამოქმედდა.

თბილისის მერმა კახა კალაძემ 2018 წლის თებერვალში ტაქსების რეფორმა დაანონსა და განაცხადა, რომ ტაქსებისთვის რეგულაციების დაწესება აუცილებელია. იმავე წლის 27 ივლისს საკრებულომ ტაქსების რეგულაციის წესი დაამტკიცა. მაშინვე ითქვა, რომ რეგულირების მეორე ეტაპი 2019 წლის პირველი ოქტომბრიდან დაიწყებოდა.