ომბუდსმენი ილია ჯიშკარიანის საქმეს ეხმიანება

საქართველოს სახალხო დამცველი თბილისის საკრებულოს დეპუტატის მიერ მისივე თანამშრომლის მიმართ განხორციელებული სავარაუდო სექსუალური და ფიზიკური ძალადობის შესახებ ინფორმაციას ეხმიანება.

ომბუდსმენი შინაგან საქმეთა სამინისტროს გამოძიების ეფექტურად წარმართვისკენ, მთავარ პროკურატურას კი გამოძიების მიმდინარეობის ზედამხედველობისკენ მოუწოდებს.

"სახალხო დამცველის აპარატმა ინფორმაციის გამოთხოვის მიზნით უკვე მიმართა სამართალდამცავ უწყებას და მისთვის მინიჭებული მანდატის ფარგლებში მონიტორინგს გაუწევს გამოძიების მიმდინარეობას. საკითხის სიმძიმიდან და მგრძნობელობიდან გამომდინარე, საქართველოს სახალხო დამცველი მოუწოდებს შინაგან საქმეთა სამინისტროს ეფექტურად წარიმართოს გამოძიება, მათ შორის, დროულად ჩაატაროს ყველა საჭირო საგამოძიებო თუ სხვა საპროცესო მოქმედება, ხოლო მთავარმა პროკურატურამ ზედამხედველობა გაუწიოს გამოძიების მიმდინარეობას. ამასთან, მნიშვნელოვანია გამოირიცხოს ყველა ეჭვი საქმის მიკერძოებით თუ პოლიტიკური ინტერესით განხილვის მიმართულებით და საგამოძიებო ორგანომ აქტიურად ითანამშრომლოს სავარაუდო მსხვერპლთან და მის წარმომადგენელთან", - აღნიშნულია განცხადებაში.

გარდა ამისა, ომბუდსმენისთვის კატეგორიულად მიუღებელია სავარაუდო მსხვერპლის პატივისა და ღირსების შემლახველი ინფორმაციის გავრცელება.

"საზოგადოებას მნიშვნელოვანია ახსოვდეს, რომ საქართველოში არაერთი ქალი განიცდის ძალადობას, შევიწროებას და ჩაგვრას. მსხვერპლებისთვის გადამწყვეტი მნიშვნელობისაა საზოგადოების მხარდაჭერა, რათა შეძლონ ძალადობრივ გამოცდილებაზე ხმამაღლა საუბარი და საკუთარი უფლებების დაცვა. სამწუხაროდ, ზემოაღნიშნული შემთხვევის განხილვისას საზოგადოების გარკვეული ნაწილი ნაკლებად იყო სოლიდარული სავარაუდო მსხვერპლის მიმართ, ადანაშაულებდა მას და ავრცელებდა მისი პატივის და ღირსების შემლახველ ინფორმაციას, რაც კატეგორიულად მიუღებელია.

მნიშვნელოვანია ყველა შესაბამისი უწყების აქტიური ჩართულობა სავარაუდო მსხვერპლის დაცვის და დახმარების მიმართულებით. თავის მხრივ, სახალხო დამცველი მონიტორინგს გაუწევს გამოძიების მიმდინარეობის პროცესს და ამ მიზნით მჭიდრო კომუნიკაცია ექნება სავარაუდო მსხვერპლთან და მისი ინტერესების დამცველთან", - წერია განცხადებაში.

საკრებულოს თანამშრომელმა თამთა თოდაძემ „ქართული ოცნების" დეპუტატი, ისნის მაჟორიტარი ილია ჯიშკარიანი სექსუალურ და ფიზიკურ ძალადობაში გუშინ დაადანაშაულა. მან „მთავარ არხთან“ საუბარში განაცხადა, რომ ჯიშკარიანმა მასზე სექსუალური ძალადობა სცადა, შემდეგ კი ფიზიკურად იძალადა.

„ალკოჰოლური თრობის ქვეშ მყოფმა გადაწყვიტა, რომ შეეძლო ჩემთან დაემყარებინა აქტი და ჩამეხუტა, კისერში დამიწყო კოცნა... უცებ დავინახე გვერდით ჩემი ტელეფონი, ვიღებ მეთქი ბატონო ილია... დამაგდო ძირს, ტელეფონი დამიფშვნა. როგორ გამოვიქეცი სახლში არ მახსოვს, ისეთ ისტერიკაში ვიყავი, საკუთარი ხელით გამოვიძახე სასწრაფო, ფსიქოლოგიც კი დამინიშნეს. არ ვიცი, რა კომენტარი გავაკეთო, ძალიან ცუდად ვარ", - განაცხადა თოდაძემ.

თამთა თოდაძე დედასთან ერთად პოლიციაში განმეორებით გამოკითხვაზე დღეს მივიდა. როგორც მისმა ადვოკატმა განაცხადა, ჯიშკარიანის ახლობელმა თოდაძის დედას ძალადობის ფაქტის უარყოფა შესთავაზა.

ჯიშკარიანის მიმართ ბრალდებებს გამოეხმაურნენ თბილისის მერი კახა კალაძე და  პარლამენტის თავმჯდომარის პირველი მოადგილე თამარ ჩუგოშვილი.

საკრებულოს თავმჯდომარის, გიორგი ტყემალაძის, განცხადებით კი ჯიშკარიანისთვის სადეპუტატო მანდატის შეწყვეტაზე საუბარი ნაადრევია. 

საქმეზე გამოძიება სისხლის სამართლის კოდექსის სამი მუხლით მიმდინარეობს.