ფრანკ-ვალტერ შტაინმაიერი ზალკალიანი-ლავროვის შეხვედრას მიესალმება

გერმანიის ფედერაციული რესპუბლიკის პრეზიდენტი ფრანკ-ვალტერ შტაინმაიერი ზალკალიან-ლავროვის შეხვედრას მიესალმება. ამის შესახებ მან პრეზიდენტის სასახლეში ქართველ კოლეგასთან სალომე ზურაბიშვილთან პირისპირ შეხვედრის შემდეგ ერთობლივ პრესკონფერენციაზე განაცხადა. 

„გერმანელებმა ვიცით საქართველოს იმედებისა და მოლოდინების შესახებ. გერმანია მხარს უჭერს ალიანსში მიღებულ გადაწყვეტილებებს. პრაქტიკული თანამშრომლობა საზღვარგარეთ მიმდინარე მისიებშიც, მაგალითად, ავღანეთში, ბოლო წლებში კიდევ უფრო მჭიდრო გახდა. ასევე შეუცვლელი და მტკიცეა გერმანიის მხარდაჭერა საქართველოს ტერიტორიული მთლიანობის საკითხშიც. ჩემი ვიზიტის ფარგლებში თავად გავეცნობი სიტუაციას ე.წ. სამხრეთ ოსეთთან არსებულ ადმინისტრაციულ ხაზთან. კარგია, რომ ისევ აღდგა საუბრის არხები საქართველოსა და რუსეთს შორის საგარეო საქმეთა მინისტრების დონეზე. ამასთან ერთად, საქართველო დამოუკიდებლად წარმოადგენს თავს და ამავე დროს აქვს თავისი პარტნიორების მხარდაჭერა. გერმანიისთვის ნათელია, რომ ტერიტორიული მთლიანობა არის პრინციპი, რომლის გარეშეც ევროპაში მშვიდობა ვერ იქნება“, - განაცხადა ფრანკ-ვალტერ შტაინმაიერმა.

სალომე ზურაბიშვილის თქმით, პირისპირ შეხვედრაზე საუბარი ოკუპირებულ ტერიტორიებზე არსებულ ვითარებასაც შეეხო.

„ჩვენ ვისაუბრეთ კონფლიქტურ სიტუაციაზე, ოკუპირებულ ტერიტორიებზე, იმაზე, რომ აუცილებელია უკრაინის კონფლიქტთან ერთად საქართველო არ იყოს მივიწყებული. ჩვენს ოკუპირებულ ტერიტორიებზე დაძაბული ვითარება ნებისმიერ დროს შეიძლება გადაიზარდოს უფრო სერიოზულ სიტუაციაში და აუცილებელია დეესკალაცია და გამოსავლის ძებნა. ერთ-ერთი მიმართულება არის მოლაპარაკებების გაძლიერება არსებულ ფორმატებში და სხვა ფორმატებშიც, სადაც სხვა კონფლიქტებიც შეიძლება იყოს განხილული. მეორე მიმართულება არის ევროკავშირის დამკვირვებლების რაოდენობის გაზრდა. 

ასევე ვახსენეთ ყველა ის მიმართულება, ევროკავშირი და ნატო, სადაც გერმანია არის ჩვენი ერთ-ერთი ყველაზე ძლიერი პარტნიორი. ძალიან მნიშვნელოვანია, რომ კომისიის ახალი თავმჯდომარე იქნება გერმანელი, რომელიც არის ჩვენი მეგობარი. დიდი იმედი გვაქვს, რომ ჩვენი პოზიციები სექტორალურ ინტეგრაციასთან მიმართებაში განმტკიცდება და ის მიმართულება, რომ საქართველო პრაქტიკულ ჭრილში გაწევრიანდეს ყველა იმ პროგრამაში, რომელიც ფაქტობრივად შეგვიყვანს ევროკავშირში პოლიტიკური გადაწყვეტილების მიღებამდე. ამ მიმართულებითაც გვაქვს ძალიან დიდი იმედი, რომ გერმანია იქნება ჩვენს გვერდით“, - განაცხადა ზურაბიშვილმა.

ოფიციალური ვიზიტის ფარგლებში, ფრანკ-ვალტერ შტაინმაიერი საქართველოს პრემიერმინისტრ გიორგი გახარიას, პარლამენტის თავმჯდომარე არჩილ თალაკვაძეს, საქართველოს კათოლიკოს-პატრიარქს, ილია მეორეს შეხვდება და საქართველოს ერთიანობისათვის დაღუპულ გმირთა მემორიალს გვირგვინით შეამკობს.

გერმანიის ფედერაციული რესპუბლიკის პრეზიდენტი თბილისში ქართველ ბიზნესმენებს შეხვდება, კახეთს ეწვევა და რამდენიმე ადგილობრივ ღვინის ქარხანას დაათვალიერებს. ოფიციალური ვიზიტის კულტურული პროგრამის ფარგლებში, ფრანკ-ვალტერ შტაინმაიერი ალავერდის მონასტერსა და ერეკლე მეფის მუზეუმს დაათვალიერებს. 

ფრანკ-ვალტერ შტაინმაიერის ვიზიტი 8 ოქტომბერს დასრულდება.