მოსამართლეობის კანდიდატი: სასამართლო ყველაზე დამოუკიდებელი ახლა და 1999-2002 წლებში იყო

პარლამენტში, იურიდიულ საკითხთა კომიტეტში უზენაესი სასამართლოს მოსამართლეობის მეთოთხმეტე კანდიდატს, ნუგზარ სხირტლაძეს უსმენენ. დეპუტატების ინტერესი, ტრადიციულად, სასამართლო დამოუკიდებლობის საკითხებს, მოსამართლის წარსულ საქმიანობასა და გამოტანილ გადაწყვეტილებებს ეხება. 

მოსამართლეობის წინა კანდიდატების გასაუბრებისგან განსხვავებით, ეს გასაუბრება მშვიდ ვითარებაში მიმდინარეობს, თუმცა მცირედი სიტყვიერი დაპირისპირება მოსმენის დროს მაინც მოხდა. დაპირისპირება სანდრო გირგვლიანის და ვანო მერაბიშვილის საქმეებს უკავშირდებოდა.

ამ საქმეებზე შეკითხვები დეპუტატ თინა ბოკუჩავას ჰქონდა - "იყო თუ არა ლევან მურუსიძე კანონის მსხვერპლი", ნუგზარ სხირტლაძე ამბობს, რომ კანონმდებლობა მნიშვნელოვანი ფაქტორია, რომელმაც შესაძლოა გავლენა იქონიოს გადაწყვეტილების ხარისხზე. 

რაც შეეხება ვანო მერაბიშვილს, ბოკუჩავას კითხვის საპასუხოდ, კანდიდატმა თქვა, რომ სტრასბურგის გადაწყვეტილებას იცნობს და იქ მერაბიშვილის პოლიტპატიმრობის შესახებ არაფერია ნათქვამი. 

სხირტლაძეს შეკითხვა დაუსვა დამოუკიდებელმა დეპუტატმა ეკა ბესელიამაც. ბესელია დაინტერესდა, რატომ ჰქონდა  ნუგზარ სხირტლაძეს 2009-2016 წლებში 10 ათასამდე საკასაციო საჩივარი განხილული, ეს მაშინ, როცა იმავე პერიოდში მოსამართლე მიხეილ ჩინჩალაძეს 4 საქმე აქვს განხილული. ამასთან დაკავშირებით ნუგზარ სხრიტლაძემ თქვა, რომ საქმეების კუთხით პალატის თავმჯდომარეს ისეთი დატვირთვა არ ჰქონდა, როგორიც რიგით მოსამართლეს. 

ბესელია ასევე დაინტერესდა თუ რომელი წლები მიაჩნია სხირტლაძეს სასამართლო სისტემისთვის ე.წ. დამოუკიდებლობის წლებად, რაზეც ნუგზარ სხრიტლაძემ უპასუხა, რომ სასამართლო დამოუკიდებლობის მაღალი ხარისხით ხასიათდებოდა 1999-2002 წლები და ხასიათდება დღეს, "დღევანდელი პერიოდში". 

იურიდიულ საკითხთა კომიტეტმა უზენაესი სასამართლოს მოსამართლეობის კანდიდატების მოსმენა 23 სექტემბერს დაიწყო. წინა დღეებში პარლამენტის იურიდიულ კომიტეტში უზენაესი სასამართლოს უვადო მოსამართლეობის კანდიდატებს: შოთა გეწაძეს, მერაბ გაბინაშვილს, თამარ ალანიას, მირანდა ერემაძეს, მამუკა ვასაძეს, მაია ვაჩაძეს, თამარ ზამბახიძეს, შალვა თადუმაძეს, ზაზა თავაძეს, ვლადიმერ კაკაბაძეს, გიორგი მიქაუტაძეს და პაატა სილაგაძეს მოუსმინეს.