საგარეო უწყება ევროკავშირის მისიის წევრების დაკავებას მშვიდობისა და უსაფრთხოების წინააღმდეგ მიმართულ ქმედებად აფასებს

„ევროკავშირის სადამკვირვებლო მისიის საქმიანობისათვის ხელის შეშლა მიუღებელია“, განაცხადა საგარეო საქმეთა სამინისტროს წარმომადგენელმა ვლადიმერ კონსტანტინიდმა 24 ოქტომბერს, ე.წ. სამხრეთ ოსეთის უსაფრთხოების შეიარაღებული ძალების მიერ, ევროკავშირის მისიის შეუიარაღებელი პატრულის დაკავების შეფასებისას.

კონსტანტინიდის განცხადებით, ევროკავშირის სადამკვირვებლო მისიის მონიტორების უკანონო დაკავება ადგილზე მშვიდობისა და უსაფრთხოების წინააღმდეგ მიმართული ქმედებაა.

„მიუღებელია მისიის საქმიანობისათვის ხელის შეშლა, რამდენადაც ის მონიტორინგის ერთადერთი საერთაშორისო და ქმედით მექანიზმია და იძლევა ობიექტურ ინფორმაციას საოკუპაციო ხაზთან არსებულ ვითარებაზე“. - აღნიშნა კონსტანტინიდმა. 

მისივე ინფორმაციით, მომხდარი ფაქტი განიხილება დღეს გამართულ, საქართველო-ევროკავშირის მაღალი დონის სტრატეგიულ შეხვედრაზე, სადაც სხვა საკითხებთან ერთად დღის წესრიგში ოკუპირებულ ტერიტორიებზე არსებული ვითარება და უსაფრთხოების კუთხით არსებული გამოწვევებია.

„ევროკავშირის სადამკვირვებლო მისია, რომელიც საქართველოში 2008 წლის აგვისტოს ომის შემდეგ განთავსდა, ემსახურება უმნიშვნელოვანეს ამოცანას - 2008 წლის 12 აგვისტოს ცეცხლის შეწყვეტის შეთანხმების შესრულების მონიტორინგსა და ადგილზე უსაფრთხოებისა და სტაბილურობის ხელშეწყობას. ქართული მხარე ასევე მკაცრად დასვამს საკითხს დღეს - ერგნეთში ინციდენტების პრევენციისა და მათზე რეაგირების მექანიზმების მორიგ შეხვედრაზე“, - აღნიშნა კონსტანტინიდმა, რომლის კომენტარს საგარეო უწყება ავრცელებს.

„ევროკავშირის მონიტორინგის მისიის შეუიარაღებელი პატრული ჩორჩანა-წნელისის ტერიტორიაზე სამხრეთ ოსეთის უსაფრთხოების ძალების შეიარაღებულმა წარმომადგენლებმა მცირე ხნით დააკავეს. ამ მოვლენის შემდეგ მალევე ცხინვალის მიერ ცხელი ხაზი გააქტიურდა“, - ასე გამოეხმაურა ევროკავშირის სადამკვირვებლო მისია 24 ოქტომბერს მომხდარ ინციდენტს, რომლის შესახებაც საოკუპაციო ძალების წარმომადგენლებმა ინფორმაცია ამავე დღეს გაავრცელეს.

მანამდე ცხინვალის საოკუპაციო რეჟიმმა ევროკავშირის მონიტორინგის მისია ე.წ. საზღვრის დარღვევაში დაადანაშაულა.