კიბერთავდასხმის გამო ტელეკომპანია „იმედი“ ტექნიკური შესაძლებლობების მხოლოდ 2%-ს იყენებს

17 საათზე მეტია ტელეკომპანია „იმედი“ საგანგებო რეჟიმში მუშაობს. კიბერთავდასხმის გამო არხის მუშაობა კვლავ პარალიზებულია. მწყობრიდან გამოსულია შიდა ქსელი, გათიშულია ინტერნეტი და კომპიუტერები.

ამ დრომდე ტელეკომპანია „იმედი“ ტექნიკური შესაძლებლობების მხოლოდ 2%-ს იყენებს. „იმედის“ IT-სპეციალისტები დაზიანებული და წაშლილი აუდიო- და ვიდეოფაილების აღდგენას ცდილობენ.

ტელეკომპანია „იმედზე“ კიბერთავდასხმა 2 ნოემბერს 21:30 საათზე დაფიქსირდა და 30 წუთს გაგრძელდა. IT-სპეციალისტების ინფორმაციით, ტელეკომპანიის ქსელში შეაღწია კრიპტოვირუსმა, რომელიც შიფრავს და აზიანებს აუდიო- და ვიდეოფაილებს. ანალოგიური ვითარებაა ტელეკომპანია „მაესტროშიც“, რომელიც „იმედის“ შენობიდან მაუწყებლობს.

„ის, რომ ახლა ეთერში ვართ, ეს ჩვენი თანამშრომლების თავდაუზოგავი და თავდადებული მუშაობის შედეგია. ეს კიბერშეტევა თავისი ტექნიკური ხასიათით განსხვავდებოდა წინა კიბერთავდასხმისგან, სავარაუდოდ მას სხვა მიზანი ჰქონდა. დაზიანებულია ვიდეოფაილები, რომლებიც ეთერში გასაშვებად იყო გამზადებული. შესაბამისად, საგანგებო რეჟიმში გვიწევს მუშაობს. შსს-ს წარმომადგენლები გუშინაც იყვნენ მოსულები, ახლაც აქტიურად მიმდინარეობს საგამოძიებო მოქმედებები“, - აცხადებს ტელეკომპანია „იმედის“ იურისტი ანდრო ლაშხი.

ბოლო კვირის განმავლობაში ეს ტელეკომპანიაზე განხორციელებული მეორე კიბერშეტევაა.

28 ოქტომბერს კიბერშეტევის გამო ტელეკომპანიის მაუწყებლობა დაახლოებით 40 წუთის განმავლობაში პარალიზებული იყო. მასშტაბური კიბერთავდასხმის გამო, პრობლემები შეექმნა ასევე ათასობით ვებგვერდს, გაითიშა პრეზიდენტის ოფიციალური და სამთავრობო ვებგვერდები. „იმედის“ IT სპეციალისტების თქმით, წინასწარი მონაცემებით, ეს იყო პარალიზებისკენ მიმართული ვირუსული თავდასხმა.

მოგვიანებით კომპანია „პროსერვისმა“, რომლის სერვერებზეც სახელმწიფო უწყებების, კერძო სექტორისა და მედია ორგანიზაციების ვებგვერდებია განთავსებული, განაცხადა, რომ „ყველაზე მასშტაბური კიბერშეტევის შედეგები აღმოფხვრილია“.