კინოთეატრ „ამირანთან“ სამართალდამცველები არიან მობილიზებულები

კინოთეატრ „ამირანში“, სადაც რამდენიმე საათში ფილმის „და ჩვენ ვიცეკვეთ“ ჩვენება გაიმართება, მაყურებლებმა შეკრება უკვე დაიწყეს. ადგილზე სამართალდამცველები იმყოფებიან, კვლავ გამკაცრებულია უსაფრთხოების ზომები. სურათის ნახვას დღეს ისინიც შეძლებენ, ვინც გუშინ შეძენილი ბილეთის მიუხედავად ეს ვერ მოახერხა. 

„ამირანის“ ადმინისტრაცია მაყურებლებს კინოთეატრში 18:00 საათით მოუწოდებს, რათა მათი უსაფრთხოება მაქსიმალურად იყოს დაცული. ფილმის პირველი სეანსი 19:30 საათზე დაიწყება. „ქართული მარშის“ წევრები და ლევან ვასაძის მხარდამჭერები ჩვენების გაპროტესტებას დღესაც აპირებენ.

ფილმის პრემიერა 8 ნოემბერს აქციების ფონზე შედგა. პრემიერის ჩაშლით „ქართული მარში, ბიზნესმენი ლევან ვასაძე და ბავშვთა უფლებების დაცვის საზოგადოების თავმჯდომარე გურამ ფალავანდიშვილი იმუქრებოდა. „ქართული მარშის“ წევრებმა ლგბტ თემის დროშაც დაწვეს. 

თბილისის პარალელურად ბათუმში კინოთეატრ „აპოლოსთან“ ვითარება დაიძაბა. ფილმის „და ჩვენ ვიცეკვეთ“ მოწინააღმდეგეები შენობაში შეჭრას შეეცადნენ.

შინაგან საქმეთა სამინისტრომ ფილმის ჩვენებისას საპროტესტო აქციების დროს მომხდარ ინციდენტებთან დაკავშირებით გამოძიება 4 ფაქტზე დაიწყო.