ტოვიო კლაარი ჩორჩანა-წნელისზე: დღეს გვაქვს სიტუაცია, რომელიც ბევრი წელია არ გვქონია

კრიზისების საკითხებში ევროკავშირის სპეციალური წარმომადგენელი სამხრეთ კავკასიასა და საქართველოში ტოვიო კლაარი აცხადებს, რომ თანათავმჯდომარეებთან ერთად მიმდინარეობს მუშაობა იმაზე, რომ წნელისი-ჩორჩანაში არსებული მდგომარეობა გამოსწორდეს და გადასასვლელები გაიხსნას. ამის შესახებ მან "ქრონიკასთან" ინტერვიუში განაცხადა.

ტოვიო კლაარის თქმით, შემდეგი კვირიდან თბილისში, ცხინვალში, სოხუმსა და მოსკოვში შეხვედრები გაიმართება. კლაარი დასძენს, რომ საერთაშორისო დისკუსიების ყველა მონაწილე თანხმდება, რომ სიტუაციის დეესკალაცია უნდა მოხდეს. "ეს არის საწყისი, საფუძველი და პროგრესის მიღწევა უნდა შევძლოთ იმ სპეციფიკური სიტუაციიდან გამომდინარე, რაც ადგილზეა შექმნილი", - განაცხადა ტოვიო კლაარმა.

"ჩვენ ადგილობრივ მოსახლეობას ცხოვრება უნდა გავუადვილოთ. ჩემი მთავარი გზავნილი დაგეგმილი შეხვედრების დროს იქნება შემდეგი - ეს არის არასასურველი სიტუაცია და ჩვენ უნდა ვიპოვოთ პრობლემის გადაჭრის გზა. ეს ნიშნავს დეესკალაციას და ინციდენტების პრევენციას. ეს არის მოკლევადიანი მთავარი მიზანი. 

ჟენევის მოლაპარაკებების მონაწილეების პოზიცია, რომ დეესკალაცია აუცილებელია, გვაძლევს იმის თქმის შესაძლებლობას, რომ მცირე, მაგრამ საფუძველი გვაქვს. ყველა ხვდება, რომ დღესდღეობით გვაქვს ისეთი სიტუაცია, რომელიც ბევრი წელია არ გვქონია. ეს ეხება ჩორჩანა-წნელისს, სადაც შეიარაღებული პერსონალი ერთმანეთთან ძალიან ახლოს დგას. ყველამ იცის, რომ ეს არის განსხვავებული სიტუაცია.

კიდევ ერთხელ ვამბობ, რომ დისკუსიის მონაწილეები გამოთქვამენ სურვილს, ერთად იპოვონ ამ ვითარებიდან გამოსავალი. ყველა კარგად აანალიზებს ევროკავშირის მონიტორინგის მისიის როლს და მათ უდიდეს წვლილს ადგილზე სტაბილურობის უზრუნველსაყოფად. ეს აღიარებულია თბილისის და სხვათა შორის მოსკოვის მიერაც. ევროკავშირის მონიტორინგის მისიას აქვს ცხელი ხაზი, რომელიც ეხმარება მხარეებს, გაცვალონ შეტყობინებები. ამას ძალიან დიდი დატვირთვა აქვს. "აპიერემის" შეხვედრები არის ძალიან საჭირო მექანიზმი და განსაკუთრებით საჭიროა დღეს. ინციდენტების პრევენციისა და მათზე რეაგირების შეხვედრები წლების განმავლობაში იმართებოდა და ყოველგვარი წინაპირობის გარეშე სრულყოფილად უნდა გაგრძელდეს.

შეხვედრის მონაწილეების მხრიდან წინაპირობების დაყენება არის მიუღებელი. ეს არის სასარგებლო და საჭირო მექანიზმი მისი ყველა ელემენტის გათვალისწინებით. ვიმედოვნებ უმოკლეს ვადებში გალში შეხვედრების აღდგენას, რადგან გალშიც ისეთივე საჭიროა ეს ფორუმი, როგორც ერგნეთში", - განაცხადა ტოვიო კლაარმა.

24 ოქტომბერს, „ევროკავშირის მონიტორინგის მისიის შეუიარაღებელი პატრული ჩორჩანა-წნელისის ტერიტორიაზე სამხრეთ ოსეთის უსაფრთხოების ძალების შეიარაღებულმა წარმომადგენლებმა მცირე ხნით დააკავეს“. 

მანამდე კი ცხინვალის საოკუპაციო რეჟიმმა ევროკავშირის მონიტორინგის მისია ე.წ. საზღვრის დარღვევაში დაადანაშაულა. მომხდარს გამოეხმაურა საგარეო უწყება. იუსტიციის მინისტრმა კი სადამკვირვებლო მისიის წევრების დაკავებას უპრეცედენტო და ზღვარგადასული ფაქტი უწოდა. ევროკავშირი კი დამკვირვებლების დაკავების ფაქტზე დიპლომატიურ რეაგირებას გეგმავს.