ოპოზიცია პარლამენტის შესასვლელს ქვიშის ტომრებით ბლოკავს

ოპოზიციამ პარლამენტის ცენტრალური შესასვლელთან ქვიშით სავსე ტომრები მიიტანა. ამ ტომრებით ისინი შესასვლელის დაბლოკვას გეგმავენ, რათა დეპუტატებს მუშაობის საშუალება არ მისცენ. ადგილზე „ნაციონალური მოძრაობის“ და „ევროპული საქართველოს“ ლიდერები იმყოფებიან. 

ამის გამო გიგი უგულავასა და სამართალდამცველებს შორის მცირე დაპირისპირება მოხდა, რადგან პოლიციამ პარლამენტთან ტომრებით დატვირთული მანქანა არ გაატარა. ამის შემდეგ დემონსტრანტებმა ტომრები შესასვლელთან ხელით მიიტანეს. 

პარლამენტთან საპროტესტო აქციის ძირითადი ნაწილი დასრულდა, თუმცა ადგილზე ისევ არიან ოპოზიციის წარმომადგენლები და ასევე აქციის მონაწილეთა ნაწილი. 

ოპოზიციის აქცია პარლამენტის წინ 15:00 საათზე დაიწყო, მოგვიანებით კი პარლამენტის ჭიშკარს ბოქლომი დაადეს, რასაც მმართველი გუნდიდან რომან კაკულიამ უპასუხა, რომ პარლამენტის ბლოკირება დიალოგის გზას სპობს. დღესვე აქცია გამართა „პატრიოტთა ალიანსმაც“.

გაერთიანებული ოპოზიციის მოთხოვნებია: „ვადამდელი პროპორციული არჩევნები, მთავრობის გადადგომა და სამოქალაქო საზოგადოებით დაკომპლექტებული ცესკო“. 

14 ნოემბერს პარლამენტმა პროპორციულ სისტემაზე გადასვლას მხარი არ დაუჭირა, რასაც პარლამენტს გარეთ პროტესტი, შენობაში კი ხმაური მოჰყვა. თამარ ჩუგოშვილმა ვიცესპიკერის თანამდებობა, ასევე საპარლამენტო უმრავლესობა რამდენიმე დეპუტატთან ერთად დატოვა.

მოგვიანებით მმართველი გუნდი რუსთავის მაჟორიტარმა გიორგი ბეგაძემ და ფრაქცია „ქართული ოცნება - კონსერვატორების“ სამმა წევრმა, ზვიად ძიძიგურმა, გიგა ბუკიამ და ნინო გოგუაძემ დატოვეს.