„ალილო“ ზუგდიდში, გორში, ბათუმსა და ყვარელშიც გაიმართა

ზუგდიდში ტრადიციული საშობაო „ალილო“ დადიანების ეზოში არსებული ვლაქერნის ღვთისმშობლის ხატის სახელობის ეკლესიიდან დაიწყო. მსვლელობა ქალაქის ცენტრალურ ქუჩაზე გაგრძელდა და ივერიის ყოვლადწმინდა ღვთისმშობლის სახელობის მშენებარე ტაძარში დასრულდა, სადაც საზეიმო წირვა-ლოცვა აღევლინა.

მსვლელობაში მონაწილეობა მოსახლეობამ, მრევლმა და სამღვდელოებამ მიიღო.„ალილოს“ მონაწილეებმა, მოხალისეებმა და ადგილობრივი ხელისუფლების წარმომადგენლებმა, სპეციალურად მოწყობილ ურემზე ძღვენი დაალაგეს, რომელიც სოციალურად დაუცველ ოჯახებს გადაეცემათ.

ბათუმში საზეიმო მსვლელობა ბათუმის ღვთისმშობლის შობის საკათედრო ტაძარიდან დაიწყო. შობის მახარობლები ქალაქის ცენტრალურ ქუჩებში გალობით გადაადგილდებიან და ადგობრივებსა და ქალაქის სტუმრებს დღესასწაულს ულოცავენ. გზადაგზა მათ მრევლი უერთდება. ალილობის მონაწილეებს საჩურებს მოქალაქეები, კომერციული ობიექტები და სახელმწუფო სტრუქტურები გადასცემენ.

ალილოზე შეგროვებული საჩუქრები მოხუცებულთა და ბავშვთა სახლებს გადაეცემათ.

საშობაო მსვლელობა გაიმართა აგრეთვე გორში. ალილოში მონაწილეობას სასულიერო პირებმა ადგილობრივი ხელისუფლების წარმომადგენლებმა და მრევლმა მიიღო. მეალილოელებმა ჯვრებით ხატებით და საშობაო საგალობლებით ქალაქის ქუჩები მოიარეს და მოსახლეობას ქრესტეშობის დადგომა ამცნეს და მიულოცეს.

მსვლელობას ღვთისმშობლის საკათედრო ტაძრიდან დაიწყო და მას ატენისა და გორის მიტროპოლიტი ანდრია მიუძღოდა.შეგროვილი ნობათი სოციალურად დაუცველ ოჯახებს და უპოვართა სასადილოს გადაეცემა.

ტრადიციული საშობაო ალილო მოეწყო ყვარელშიც. ჯვარ-ხატებით ხელში და ნაკურთხი წყლით სასულიერო პირებმა, ქრისტეშობის მახარობლებთან და ადგილობრივ მოსახლეობასთან ერთად ქალაქის ქუჩებში მსვლელობა გამართეს, შეგროვდა საშობა ნობათი და ტკბილეული, რომელიც მოგვიანებით გაჭირვებულ ოჯახებს გადაეცემა.

ალილოს მსვლელობას, რომელიც „ნეკრესის ახალგაზრდული ცენტრის“ ორგანიზებითა და ნეკრესის ეპარქიის წინამძღვრის მეუფე სერგის ლოცვა-კურთხევით გაიმართება, ადგილობრივი ხელისუფლების წარმომადგენლებიც შეურთდნენ.

„ალილოს“ტრადიცია 2001 წელს კათოლიკოს–პატრიარქის, ილია მეორის კურთხევით აღდგა.