გრიგოლ ვაშაძე “ნაციონალური მოძრაობის“ დატოვებას უარყოფს

გრიგოლ ვაშაძე “ნაციონალური მოძრაობის“ დატოვების შესახებ ინფორმაციას უარყოფს, - ამის შესახებ მან ჟურნალისტებთან საუბრისას განაცხადა.

„წავედი მარტო დალაი-ლამას და რომის პაპის თანამდებობებიდან და „ნაციონალურ მოძრაობაში“ ვრჩები. ყველა სისულელეს რატომ უსმენთ?! რამდენი მოცლილი რაღაცას დაწერს, ყველაფერს რატომ უსმენთ?! როგორ წარმოგიდგენიათ ჯერ ჩემი და მიხეილ სააკაშვილის კონფლიქტი და მერე ის, რომ მე გადავდექი ისე, რომ ეს ვიღაცამ იცის და არ მივმართე პარტიას?!“, - აღნიშნა ვაშაძემ. 

ჟურნალისტების შეკითხვაზე, იქნება თუ არა გრიგოლ ვაშაძე მიხეილ სააკაშვილი შტაბში, ვაშაძე აცხადებს, რომ მიხეილ სააკაშვილის პირადი შტაბი კიდევ ერთი პლატფორმაა, რომელიც იბრძოლებს იმისთვის, რომ „საქართველოს მოაშოროს ადამიანების ის უმსგავსო  ჯგუფი, რომელიც თავის თავს ხელისუფლებას ეძეხის და ყურებამდეა კორუფციაში ჩაფლული“.

„ოპოზიციის ეს პლატფორმა არჩევნებისთვისაა შექმნილი და პარტიას ბევრ საკითხში თავისი პოზიცია აქვს. თუ ვინმე არ აპირებს ვინმესთან მუშაობას, ეს მისი კონსტიტუციური და სუვერენული უფლებაა“, - აღნიშნა გრიგოლ ვაშაძემ.

რამდენიმე დღეა ვრცელდება ინფორმაცია, თითქოს გრიგოლ ვაშაძე პარტიის თავმჯდომარის პოსტს მიხეილ სააკაშვილთან უთანხმოების გამო ტოვებს.

„ნაციონალური მოძრაობა“ ბოლო დღეებში ჩიორა თაქთაქიშვილმა, ნინო კალანდაძემ, ზაზა ბიბილაშვილმა და მარიამ გერსამიამ დატოვეს.