აუდიტის სამსახურმა 2016 წელს 71 მილიონი ლარის მოცულობის დარღვევები აღმოაჩინა

სახელმწიფო აუდიტის სამსახურის უფროსის მოადგილემ ნინო ლომჯარიამ მედიას გასული წლის საქმიანობის შედეგები გააცნო.

2016 წელს სახელმწიფო აუდიტის სამსახურმა აუდიტორული შემოწმება ჩაატარა ცენტრალური და ადგილობრივი მმართველობის ისეთ სფეროებში, რომლებიც საბიუჯეტო სახსრების მოცულობიდან გამომდინარე, ხასიათდება მომატებული რისკებითა და მაღალი საზოგადოებრივი  დაინტერესებით. შესწავლის ობიექტი იყო ისეთი სექტორები, როგორებიცაა, ჯანდაცვა, განათლება, თავდაცვა, ინფრასტრუქტურა, გარემოს დაცვა, ეკონომიკა და სხვა სფეროები. სულ სამსახურმა ჩაატარა 71 აუდიტი, რამაც ჯამში მოიცვა 10.3 მილიარდი ლარის ხარჯი. ჩატარებული აუდიტებით გამოვლენილმა დარღვევების საერთო მოცულობამ 71 მილიონი ლარი შეადგინა,  მათ შორის:

- შესყიდვების მართვის მიმართულებით არსებული ხარვეზების მოცულობამ - 32 მილიონ 8 ათასი ლარი;

- საბიუჯეტო რესურსების მართვის მიმართულებით - 33 მილიონ 4 ათასი ლარი;

- აქტივების მართვის მიმართულებით - 5 მილიონი ლარი.

ხარვეზების გამოსასწორებლად გაიცა 189 რეკომენდაცია. ამ დროისათვის შესრულებულია რეკომენდაციების 47%. მაღალპრიორიტეტული რეკომენდაციების მაჩვენებელი  დღეისათვის მხოლოდ 22%-ით განისაზღვრება.   გასულ  წელს  რეკომენდაციების შესრულების მაჩვენებელი 40%-ით განისაზღვრებოდა. მართალია,   წინა წელთან შედარებით, ეს მზარდი მაჩვენებელია, მაგრამ   შესრულების მაჩვენებელი არ არის მაღალი და მისი გაუმჯობესება საჭიროებს მეტ ძალისხმევას.  მნიშვნელოვანია იმის ხაზგასმა, რომ აუდიტორული საქმიანობის სარგებელი გამოიხატება არა მარტო რეკომენდაციების გაცემაში, არამედ - მათ შესრულებაში.

2016 წელს სამართალდამცავ ორგანოებში გადაიგზავნა  აუდიტის 27 ანგარიში და შესაბამისი მასალები.

ანგარიშში არ მოხვდა ყოფილი მთავარი პროკურორისთვის თბილისის მერიის მიერ მიწების გადაცემასთან დაკავშირებით აუდიტის შესახებ ინფორმაცია, რაც გენერალურ აუდიტორ ლაშა თორდიასა და ყოფილ მთავარ პროკურორ ოთარ ფარცხალაძეს შორის დაპირისპირების მიზეზი გახდა. ლომჯარიას განცხადებით, ამის შესახებ, სავარაუდოდ, 2017 წლის შემაჯამებელ დოკუმენტში იქნება საუბარი.

ლაშა თორდია 2016 წლის ანგარიშის შეჯამებას არ დასწრებია.