დეკანოზ მამალაძის ძმა პატრიარქთან შეხვედრის აუდიო-ვიდეომასალის სრულ ვერსიას ითხოვს

დეკანოზ გიორგი მამალაძის ძმა საპატრიარქოს წერილით მიმართავს. თორნიკე მამალაძე პატრიარქთან შეხვედრის აუდიო-ვიდეოჩანაწერის სრულ ვერსიის გადმოცემას ითხოვს. მისი განცხადებით, ჩანაწერის ავთენტურობაში ეჭვის შეტანის შემთხვევაში, ოჯახი შესაბამის ექსპერტიზის ჩატარებას მოითხოვს. თორნიკე მამალაძე ამბობს, რომ პარტიარქთან შეხვედრის დროს დაკავებული დეკანოზის ზიარების შესახებ პატრიარქმა ვრცლად ისაუბრა, თუმცა შეხვედრის შემდეგ სასულიერო პირებმა ეს ინფორმაცია არ დაადასტურეს.

"განცხადება შეგვაქვს იმასთან დაკავშირებით, რომ მოგვაწოდონ ორი დღის განმავლობაში ის აუდიოჩანაწერი სრულყოფილად, სადაც ჩვენი საუბრები იყო ჩაწერილი. მინდა, რომ ჩემი ყურით მოვისმინო და თუ რაიმე ეჭვი შემეპარება, ექსპერტიზას ჩავატარებ. მე ვესწრებოდი ამ შეხვედრას, ჩემი ოჯახის წევრები ესწრებოდნენ და ყველამ ვიცით, რომ ზიარებასთან დაკავშირებით გვითხრეს, რომ პატრიარქმა კურთხევა მოგვცა და ხვალ ან ზეგ უნდა ვაზიაროთო. გარეთ გამოვიდნენ და თქვეს, არ ვაზიარებთ, უბრალოდ მოსანახულებლად მივალთო. მე არ მინახავს, რა გაასაჯაროეს, მაგრამ ამ ყველაფერთან დაკავშირებით ექსპერტიზას ჩავატარებ", - განაცხადა თორნიკე მამალაძემ.

ასეთივე მოთხოვნა წამოაყენა დეკანოზის ადვოკატმა გიორგი ფანცულაიამ. „ვიცი, რომ ვიდეოჩაწერაც იყო და გვანახონ, ხელით როგორ აჩერებდა დეკანოზს მამა დავით ჭინჭარაული. აუდიოჩანაწერში არ გამოჩნდება უწმინდესი როგორი გაოცებული უსმენდა თორნიკე მამალაძის სიმართლეს“, - ასე გამოეხმაურა დეკანოზ გიორგი მამალაძის ადვოკატი გიორგი ფანცულაია საქართველოს საპატრიარქოს მიერ გავრცელებულ პატრიარქის და დეკანოზის ოჯახის შეხვედრის აუდიოჩანაწერს. ადვოკატის თქმით, ის ჯერ აუდიოჩანაწერს არ გაცნობია, თუმცა ვიდეოჩანაწერის გამოქვეყნებასაც ითხოვს. „ჯერ ვერ გავეცანი აუდიოჩანაწერს. ვიცი, რომ იყო ვიდეოჩაწერა და თუ გასაჯაროებაა, ვიდეოც უნდა გვანახონ. მაგალითად, მამა დავით ჭინჭარაული ხელით როგორ აჩერებდა დეკანოზს, ეს აუდიოჩანაწერში არ ჩანს“, - განაცხადა ფანცულაიამ.

ეს განცხადებები თბილისის საქალაქო სასამართლოში გაკეთდა, სადაც დეკანოზის საქმის არსებითი განხილვა განახლდა. 

დღეს საქართველოს საპატრიარქოს ოფიციალურ ვებგვერდზე 21 ივნისს პატრიარქის და დეკანოზ გიორგი მამალაძის ოჯახის წევრების შეხვედრის ჩანაწერი გავრცელდა. 

დეკანოზი გიორგი (მამალაძე) მკვლელობის მომზადების ბრალდებით თბილისის საერთაშორისო აეროპორტში 10 თებერვალს დააკავეს. ის ბერლინში პატრიარქთან მიფრინავდა. ილია მეორეს HELIOS Klinikum Berlin-Buch-ში ოპერაციისთვის ამზადებდნენ. ჟურნალისტმა ირაკლი მამალაძემ პროკურატურას აცნობა, რომ მამა გიორგიმ ციანიდის მოძიებაში დახმარება სთხოვა, რითაც მაღალი იერარქიის სასულიერო პირი უნდა მოეწამლა.

გიორგი ფანცულაია