imedi /  12 სექტემბერი 2017, 19:43 / სანდო წყარო

“ქართული მარშის“ ერთ-ერთი ლიდერი, ლადო სადღობელაშვილი დააკავეს

ლადო სადღობელაშვილი

“ქართული ოცნების“ მერობის კანდიდატის, კახი კალაძის შტაბთან აქციის მონაწილეებსა და სამართალდამცველებს შორის დაპირისპირება მოხდა. დაკავებულია “ქართული მარშის“ ერთ-ერთი ლიდერი, ლადო სადღობელაშვილი. შსს-ს განმარტებით, ის ადმინისტრაციული მუხლით დააკავეს.

უთანხმოება სამართალდამცველებთან “ქართული მარშის“ წევრების მოთხოვნამ გამოიწვია, რომ შტაბის შენობაში კალაძესთან მოსალაპარაკებლად ოთხკაციანი ჯგუფი შეეშვათ, რაზეც პოლიციელებისგან უარი მიიღეს.

კალაძის შტაბთან მისვლამდე, მარშის წევრებმა ფონდ “ღია საზოგადოება საქართველოსთან“ სამართალდამცველებს მაშხალები დაუშინეს.

აქციის წევრები აცხადებენ, რომ ისინი ხელისუფლებას ერთკვირიან ვადას აძლევენ მათი მოთხოვნების დასაკმაყოფილებლად. წინააღმდეგ შემთხვევაში რადიკალურ ზომებს მიმართავენ.

მოძრაობა “ქართულმა მარშმა“ 11 სექტემბერს რადიკალური და გრძელვადიანი აქციები დააანონსა და საქართველოს ხელისუფლებას მოუწოდა, რომ მიწა უცხოელებზე არ გაყიდოს. 

15 ივნისს პარლამენტმა სასოფლო-სამეურნეო მიწის უცხო ქვეყნის მოქალაქეზე გასხვისებაზე მორატორიუმი პირველი მოსმენით მიიღო. მორატორიუმს მხარი არ დაუჭირა „ნაციონალურმა მოძრაობამ“ და „ევროპულმა საქართველომ“.

6 სექტემბერს ცნობილი გახდა, რომ სასოფლო-სამეურნეო დანიშნულების მიწის შეძენასთან დაკავშირებით კანონით დადგენილი შეზღუდვა კომერციულ ბანკებზე არ გავრცელდება. ეს შეზღუდვა ასევე არ გავრცელდება განსკუთრებულ შემთხვევებზე, რომლებიც მთავრობის გადაწყვეტილებით განისაზღვრება.

კომენტარები ()