სეს: თბილისში აზიური ფაროსანა მხოლოდ ვაკის პარკშია

სურსათის ეროვნული სააგენტოს სპეციალისტების მიერ ჩატარებული კვლევის შედეგად აზიური ფაროსანა დაფიქსირდა დედაქალაქშიც. შესაბამისად, სურსათის ეროვნული სააგენტო თბილისის მერიასთან და გარემოს დაცვის სამინისტროსთან ერთად აზიურ ფაროსანასთან ბრძოლის კომპლექსურ ღონისძიებებს გაატარებს. ინფორმაცია სურსათის ეროვნული სააგენტოს ვებგვერდზე ვრცელდება.

სპეციალისტების თქმით, აზიურ ფაროსანას, მისი ბიოლოგიიდან გამომდინარე, გადაადგილება დიდ მანძილზე, დაახლოებით ათეულობით კილომეტრზე შეუძლია. ტემპერატურის ვარდნასთან ერთად მავნებელი მიგრირებს საცხოვრებელი სახლებისკენ და ურბანულ ტერიტორიებზე.

პრეპარატების გამოყენება დაუშვებელია საცხოვრებელ სახლებში. ამ შემთხვევაში, სამინისტროს წარმომადგენლების თქმით, მნიშვნელოვანია მოსახლეობის ჩართულობა და მექანიკური ღონისძიებების ჩატარება, რომლის შესახებაც ინფორმაცია განთავსებულია სურსათის ეროვნული სააგენტოს ვებგვერდსა და სოციალურ ქსელში. ასევე მოსახლეობას მიეცემა დამატებითი რეკომენდაციები. 

სააგენტოს უფროსის მოადგილის, ზურაბ ლიპარტიას განცხადებით, ამ მომენტისათვის ფაროსანა მხოლოდ ვაკის პარკშია, ერთ კონკრეტულ ადგილასაა გავრცელებული. მისი განმარტებით, ეს ადგილი უახლოეს მომავალში შეიწამლება. სამუშაოები სავარაუდოდ ღამის საათებში ჩატარდება, რათა პარკში მისულ დამსვენებლებს რაიმე საფრთხე არ შეექმნათ.

ამას გარდა, ლიპარტიამ, დღეს გამართულ პრესკონფერენციაზე მწერის თბილისში გადმოტანის მიზეზებიც დაასახელა.

“ის სატრანსპორტო საშუალება, რომელიც დასავლეთ საქართველოდან თბილისში შემოდის, პოტენციური გადამტანია. რაოდენობა რა თქმა უნდა ის არაა, რაც დასავლეთ საქართველოში და ამას შემოსევას ვერ დავარქმევთ. თუმცა გარკვეული რაოდენობა არის, რაც შესაბამისი ღონისძიებების გატარებას საჭიროებს. რათა მავნებელი დედაქალაქის სხვა უბნებშიც არ გავრცელდეს”, - განმარტა ლიპარტიამ.

აზიური ფაროსანა ვაკის პარკში გუშინ შენიშნეს. 

აზიურმა ფაროსანამ დასავლეთ საქართველოს რეგიონებში მოსავლის დიდი ნაწილი გაანადგურა. მავნებელი მოსახლეობის საკარმიდამო ნაკვეთებიდან სახლებში და საჯარო დაწესებულებებშიც გადავიდა.