ძლიერმა წვიმამ და ქარმა აჭარის ექვსივე მუნიციპალიტეტში ინფრასტრუქტურა დააზიანა

აჭარის მთავრობის ცნობით, ძლიერმა წვიმამ და ქარმა ექვსივე მუნიციპალიტეტი დააზარალა.

ხულოს მუნიციპალიტეტში უხვი ნალექის შედეგად დიაკონიძეებში, დანისპარაულში, რაქვთასა და იაკობიძეებში საცხოვრებელ სახლებთან მეწყერი ჩამოწვა. 

გააქტიურებული მეწყრული პროცესების შედეგად, სულ, აჭარაში 18 ოჯახს შეექმნა საფრთხე, ყველა მათგანი უსაფრთხო ადგილზეა გადაყვანილი.

შუახევში მეწყრის შედეგად ადიდებულმა მდინარემ წყალსაყრის ადმინისტრაციულ ერთეულში დაშალა 6-მეტრიანი ბეტონის ხიდი. ხიდი ასევე დაზიანდა ხიჭაური-ჭვანის გზაზე. მეწყერი ჩამოწვა ცენტრალურ გზაზე, რომელიც ამჟამად ჩაკეტილია, ტრანსპორტი შეფერხებით მოძრაობს.

ჩაკეტილია გზები სოფელ წყაროთაში და სოფელ კობალთაში. ქარმა დააზიანა საცხოვრებელი სახლები და დამხმარე ნაგებობები. მეწყრული პროცესები განვითარდა დაბა შუახევში. ელექტროხაზების დაზიანების გამო დენი არ მიეწოდება შუბნის ამდინისტრაციული ერთეულების სოფლებს. უწყვეტ რეჟიმში მიმდინარეობს აღდგენითი სამუშაოები.

უამინდობამ პრობლემები ქობულეთშიც შექმნა. უხვი ნალექის გამო რიგ სოფლებში (ქაქუთი, ჩაისუბანი, ლეღვა) ჩაკეტილია გზები. ზედა აჭყვაში ჩაიკეტა ცენტრალური გზა. დაბა ჩაქვში დამბაზე გადმოვიდა მდინარე ჩაქვისთავი, დაიტბორა ერთი ოჯახი. სოფლებში ლეღვა, ჩაისუბანი, წყავროკა, ციხისძირი - რამდენიმე მოქალაქის საცხოვრებელ სახლთან განვითარდა მეწყრული კერები.

ხელვაჩაურის მუნიციპალიტეტში ორთაბათუმში, სამებასა და განთიადში რამდენიმე საცხოვრებელ სახლთან ჩამოწყვა მეწყერი. ყველა მიმართულებით მიმდინარეობს გაწმენდითი სამუშაოები.

რაც შეეხება ქედას, უხვი ნალექის შედეგად მეწყერი ჩამოწვა საცხოვრებელ სახლებთან შემდეგ სოფლებში: მეძიბნა, ზვარე, ძანაძეები, სირაბიძეები, ვარჯანისი, ჭინკაძეები, ცხემნა, ზენდითში და აგოთაში. სოფელ აბუქეთაში 9 ოჯახი უსაფრთხო ადგილას არის გადაყვანილი. დაბა ქედაში დაზიანდა შიდა სასოფლო გზები.

სასწავლო პროცესი მუნიციპალიტეტების ყველა სკოლაში შეუფერხებლად მიმდინარეობს.

უამინდობამ შეაფერხა ელექტროენერგიის მიწოდებაც. ამ ეტაპისთვის, შუქი არ აქვს ქობულეთში 500-მდე აბონენტს, ზემო აჭარაში - 300-მდე აბონენტს. ,,ენერგო-პრო ჯორჯია“-ს მობილური ჯგუფები უწყვეტ რეჟიმში მუშაობენ. 

სტიქიასთან ბრძოლის მუნიციპალური შტაბები საგანგებო რეჟიმში მუშაობენ, მობილიზებულია სამაშველო ბრიგადები და მობილური ჯგუფები. მეწყრულ კერებს გეოლოგები ამინდის დადგომისთანავე შეისწავლიან.

ბათუმში განვითარებულმა უამინდობამ და ძლიერმა შტორმმა ბულვარში სანაპირო ზოლის რამდენიმე მონაკვეთი ქვიშითა და ქვაღორღით დაფარა. მთელი ღამის განმავლობაში ადგილზე მობილიზებული იყო რამდენიმე ერთეული სპეციალური ტექნიკა და სამაშველო ბრიგადები. 

ბათუმში მოსული უხვი ნალექისა და ქარის შედეგად უნივერსიტეტის საერთო საცხოვრებელს და რამდენიმე საცხოვრებელ სახლს დაუზიანდა სახურავი. ასევე, შეიქმნა წყლის გამტარუნარიანობის პრობლემა არდაგანის ტბის მიმდებარედ, ქალაქის წყალმიმღები სანიაღვრე სისტემა გამართულად მუშაობს.

გარდა ამისა, ქარმა მოშალა რამდენიმე სარეკლამო ბანერი და სამშენებლო ღობე. მერიის შესაბამისმა სამსახურმა უკვე გააფრთხილა კერძო მესაკუთრეები. შეუფერხებლად გადაადგილდება საზოგადოებრივი ტრანსპორტი.

წყალმომარაგება აღდგენილია ყველგან, გარდა ჩაქვისა და ჩაისუბნის ე.წ. ძველი ქსელის აბონენტებისა. წყალმომარაგება სრულად სათავე ნაგებობაზე წყლის დონის დაწევისთანავე აღდგება.

გადაადგილების პრობლემა არ შექმნია საზოგადოებრივ ტრანსპორტს. ელექტროენერგია და ბუნებრივი აირი ბათუმის აბონენტებს შეუფერხებლად მიეწოდებათ.