კობახიძე: უმრავლესობას და უმცირესობას ისრაელთან მეგობრობა გვაერთიანებს

ისრაელში ოფიციალური ვიზიტით მყოფი პარლამენტის თავმჯდომარე ირაკლი კობახიძე კოლეგას შეხვდა. ორი ქვეყნის პარლამენტების თავმჯდომარეებმა ჯერ დახურულ ფორმატში, შემდეგ კი გაფაროებულ შეხვედრაზე ისაუბრეს.

შეხვედრის მონაწილეებს ირაკლი კობახიძემ და იული იოელ ედენშტეინმა სიტყვით მიმართეს.

"ჩვენ ვამაყობთ ჩვენს ხალხებს შორის 26-საუკუნოვანი, ისტორიული კავშირით და სწორედ ეს ქმნის განსაკუთრებულ მოტივაციას ჩვენს ქვეყნებს შორის ურთიერთობის, მეგობრობისა და თანამშრომლობის გაძლიერებისთვის. არის ბევრი სფერო, სადაც ჩვენ თანამშრომლობის გაძლიერება შეგვიძლია და უკვე არსებობს მრავალი მიმართულება, სადაც აქტიურად ვთანამშრომლობთ.
 
ვიცით, რომ საქართველოს პრემიერმინისტრი ეწვია ისრაელს და თქვენს ქვეყანაში ძალიან ნაყოფიერი ვიზიტი ჰქონდა. ჩვენი შეხვედრა, ასევე, ძალიან მნიშვნელოვანი კონტრიბუციაა ჩვენს ხალხებს შორის თანამშრომლობისა და მეგობრობის გაღრმავებისთვის. ჩვენ გვჯერა საქართველოსა და ისრაელს შორის ძლიერი თანამშრომლობისა და მეგობრობის. ჩვენი მხრიდან მოტივაციაა, ვიყოთ თქვენი ძლიერი პარტნიორი და ეს არის ჩვენი სტრატეგიული ინტერესიც. 

"დელეგაცია საქართველოს პარლამენტის 11 წევრისგან შედგება, რაც ისრაელის სახელმწიფოსთან თანამშრომლობის ინტერესის დემონსტრირებაა. ასევე, ეს აჩვენებს ქართველი ხალხის სიყვარულს ებრაელი ხალხისა და ისრაელის მიმართ. ჩვენი დელეგაციის შემადგენლობაში არიან საპარლამენტო უმრავლესობისა და უმცირესობის ლიდერებიც. ჩვენ ერთმანეთთან მრავალი წინააღმდეგობა გვაქვს, თუმცა, არსებობს საკითხი, რომელზეც ყველა ვთანხმდებით - ეს არის მეგობრობა ისრაელთან", - განაცხადა ირაკლი კობახიძემ.

ისრაელში ქართული დელეგაციის ოფიციალური ვიზიტი გუშინ დაიწყო.