მეუფე შიო: ჩემთვის უდიდესი ჯვარია მოსაყდრედ ყოფნა

საპატრიარქოს ტახტის მოსაყდრემ, ჩხოროწყუსა და სენაკის მიტროპოლიტმა მეუფე შიომ მოსაყდრედ დასახელების შემდეგ მედიასთან პირველი კომენტარი გააკეთა.

მისი განცხადებით, ამ თანამდებობაზე დასახელება მოულოდნელი იყო და გუშინ, გვიან ღამით შეიტყო. 

"ნამდვილად, ჩემთვის სრულიად მოულოდნელი იყო. ძალიან ვღელავ. ერთი მხრივ, დიდი სიხარულია რომ მისმა უწმინდესობამ ასეთი დიდი პატივი მარგუნა, მეორე მხრივ, ძალიან ვღელავ, რამეთუ ეს უდიდესი ჯვარია. იმედი მაქვს ღვთის მადლის შეწევნის, წმინდა გიორგის მადლისა და მისი უწმინდესობის მამობრივი ლოცვა-კურთხევის.

ვერ გეტყვით, რატომ მიიღო ამ ფორმით ჩემი დასახელების გადაწყვეტილება. ამ მსახურებისთვის ჩემი თავი უღირსად მიმაჩნია. მეტის თქმა არ შემიძლია. ეს არის განსაკუთრებული ვითარება. არ მახსოვს, ჩვენ ისტორიაში ასეთი ფაქტი მომხდარიყოს. უახლოეს პერიოდში გამოჩნდება, რა ვალდებულებები მექნება", - განაცხადა მეუფე შიომ.

პატრიარქი კი იმედოვნებს, რომ მეუფე შიო დაკისრებულ მოვალეობას თავს გაართმევს.

დღეს პატრიარქმა საკუთარ მოსაყდრედ ჩხოროწყუსა და სენაკის მიტროპოლიტი შიო მუჯირი დაასახელა. ბრძანება, რომელიც, ილია მეორის თქმით, დღეს დაიწერა, მან ქაშუეთის ეკლესიაში სადღესასწაულო წირვის დაწყებამდე წაიკითხა. 

ერისკაცობაში ელიზბარ თეიმურაზის ძე მუჯირი 1969 წლის 1 თებერვალს, თბილისში დაიბადა. 1993 წლის 5 იანვარს ბერად აღიკვეცა. შიო მუჯირი სენაკისა და ჩხოროწყუს, ავსტრალიისა და ახალი ზელანდიის მიტროპოლიტია.