კახა ბექაური: საერთაშორისო გამჭვირვალობის დასკვნა არაკვალიფიციურია

საქართველოს კომუნიკაციების მარეგულირებელი კომისიის თავმჯდომარე კახა ბექაური "საერთაშორისო გამჭვირვალობა-საქართველოს" დასკვნას, მისი დიპლომის კომისიის წევრობის მოთხოვნებთან შეუსაბამობაზე, არაკვალიფიციურს უწოდებს.

"ფაქტი ფაქტად რჩება, დასკვნა არაკვალიფიციურია. რაც შეეხება იმას, თუ რა შეიძლება იყოს დასკვნის მიზანი, ეს შეიძლება იყოს ჩემი საქმიანი რეპუტაციის დისკრედიტაცია. არაფერს ვამტკიცებ, ეს მხოლოდ მოსაზრებაა", - განაცხადა კახა ბექაურმა პრესკონფერენციაზე.

"ცხადია, ყველა ამ ინსტანციამ დაადასტურა, რომ ჩემი, როგორც კანდიდატის კვალიფიკაცია შესაბამისობაშია კომისიის წევრობის საკანონმდებლო მოთხოვნებთან და კანონიერად ამირჩია. რაც შეეხება მოთხოვნას, რომ წევრს უნდა ჰქონოდა მაგისტრთან გათანაბრებული ხარისხი, მე 1992 წელს დავამთავრე თბილისის სახელმწიფო უნივერსიტეტის კიბერნეტიკისა და გამოყენებითი მათემატიკის ფაკულტეტი, სპეციალობით ოპტიმიზაცია და ოპტიმალური მართვა. ეს დიპლომი არის მაგისტრთან გათანაბრებული. რაც შეეხება სფეროს, რომელზეც იყო დასკვნაში საუბარი, ცხადია იმ სფეროს გამოცდილებაა, რადგან იმ წლებში იყო 5-წლიანი სწავლება და 2005 წელს სპეციალობები უკვე გაერთიანებულია", - განაცხადა ბექაურმა.

შესაბამისად, მისი თქმით, კითხვა იმაზე, აღნიშნულ ფაკულტეტდამთავრებულს შეუძლია თუ არა ამ სპეციალობებით მუშაობა, არ უნდა დაისვას.

კახა ბექაურმა დასძინა, რომ ორგანიზაციას "ბოლო დროს ჩვევია არაკვალიფიციური დასკვნების გამოქვეყნება."

კომუნიკაციების კომისიის თავმჯდომარე ტელეკომპანია "რუსთავი 2"-ზე გასულ სიუჟეტსაც გამოეხმაურა და თქვა, რომ სამაუწყებლო კომპანიამ არასამთავრობო ორგანიზაციის დამახინჯებული დასკვნა კიდევ უფრო დაამახინჯა.
 
„გუშინ, ასევე ერთ-ერთმა სამაუწყებლო არხმა, კერძოდ „რუსთავი 2“-მა დამახინჯებული ფაქტები და არაკვალიფიციური დასკვნა კიდევ უფრო დაამახინჯა. „რუსთავი 2“-ის სიუჟეტიდან ისე გამოდიოდა, რომ მაგისტრის დიპლომი არ გამაჩნია, რაც აბსოლუტურად ტყუილია. თუმცა, ამ სამაუწყებლო არხისგან ეს გასაგებია, რადგან კარგად ვიცით, დღეს რა პოლიტიკას ეწევა არხი და მისი ხელმძღვანელი, ვისი ცენზურის ქვეშ მუშაობს არხი და ბატონი გვარამია. ყველამ კარგად ვიცით წინა ხელისუფლების დროს როდესაც მთელი მედიის ტერორი ხორციელდებოდა გვარამია სრულიად მედიის მთავრ ცენზორს და დამტერორებელს წარმოადგენდა . როგორც ჩანს ნოსტალგია აქვს, რომ ისევ მისი ცენზურის ქვეშ იმუშაოს მედიამ, მაგრამ ეს არ გამოუვა რადგან დღეს მედია სრულიად თავისუფალია. განხორციელებული რეფორმების შედეგად, რომელიც კომისიაში ჩვენი მუშაობის პერიოდში განხორციელდა დღეს  40 არხი ფუნქციონირებს და სრული პასუხისმგებლობით ვაცხადებ რომ საქართველოში ის დრო აღარ დაბრუნდება და ჩემი თავმჯდოამრეობის პერიოდში მედია სრულად თავისუფალი იქნება , მათ შორის გვარამიაც იქნება თავისუფალი თავის ცენზურაში, სადაც უნდა და როგორც უნდა. ყველა სამაუწყებლო არხი  იქნება თავისუფალი და ტყუილის თქმაც დაცული იქნება, თუმცა საზოგადოება ბედნიერია რომ დღეს აღარ არის ერთი ინფორმაციის წყარო და ბევრი წყაროა   საიდანაც ინფორმაციის მიღება შეგვიძლია”, - განაცხადა კახა ბექაურმა. 

11 დეკემბერს TI-მ გამოაქვეყნა დასკვნა, რომელშიც წერს, თითქოს კახა ბექაური კომუნიკაციების ეროვნული კომისიის წევრის თავმჯდომარის საკვალიფიკაციო მოთხოვნებს ვერ აკმაყოფილებს.