აფგან მუხტარლი გატაცების დაგეგმვაში გიორგი კვირიკაშვილს ადანაშაულებს

29 მაისს თბილისიდან გაუჩინარებული და აზერბაიჯანში დაკავებული ჟურნალისტი, აფგან მუხტარლი გატაცებაში პრემიერ-მინისტრს, გიორგი კვირიკაშვილს ადანაშაულებს. აზერბაიჯანელ ჟურნალისტთან სატელეფონო ინტერვიუს tvpirveli ავრცელებს.

მუხტარლის თქმით, კვირიკაშვილის გარდა, საქართველოდან მისი გატაცების დაგეგმვასა და მომზადებაში სხვა მაღალჩინოსნებმაც მიიღეს მონაწილეობა. მუხთარლის შეფასებით, აზერბაიჯანის ხელისუფლებას მისი საგამოძიებო სტატიები აღიზიანებდა. ქართულმა მხარემ კი, იმის გამო, რომ ჟურნალისტის სამართლებრივი დევნის მიზეზი არ არსებობდა, დაგეგმა,  საქართველოდან ის ქართველ სამართალდამცველებს გაეტაცათ და აზერბაიჯანული მხარისთვის გადაეცათ. 

„ამ დანაშაულის სათავეში პრემიერ-მინისტრი, კვირიკაშვილი დგას. სწორედ მან გასცა ბრძანება ჩემი გატაცების შესახებ. გატაცებაში მონაწილეობა საქართველოს საბაჟოს ხელმღვანელმაც, ლაგოდეხის საბაჟო პუნქტის უფროსმა და კრიმინალურმა პოლიციამაც მიიღო. აზერბაიჯანულ მხარეს ორი წლის განმავლობაში სურდა ჩემი დაკავება, - რაც ჩემი ჟურნალისტური საქმიანობით იყო გამოწვეული. მე აქტიურად ვიკვლევდი ალიევის ბიზნესებს. მას ჩემი დაკავება სურდა, რათა გავჩუმებულიყავი“ -თქვა მუხტარლიმ.

მისივე თქმით, მასზე თვალთვალი გატაცებამდე ორი თვით ადრე დაიწყო. მუხტარლის ეჭვი აქვს, რომ მისი გატაცებით ქართულმა მხარემ და კონკრეტულმა პირებმა ფინანსური სარგებელი მიიღეს. 

აზერბაიჯანელ ჟურნალისტს და უფლებადამცველს, აფგან მუხტარლის, რომელიც 29 მაისს თბილისში გაუჩინარდა, აზერბაიჯანის სასამართლომ საზღვრის უკანონოდ გადაკვეთის, საზღვარზე 10,000 ევროს არადეკლარირებულად გადატანასა და მესაზღვრისთვის წინააღმდეგობის გაწევის გამო, 6 წლით თავისუფლების აღკვეთა მიუსაჯა.

საქართველოში მუხტარლის საქმეზე შსს-მ გამოძიება სისხლის სამართლის კოდექსის 143-ე მუხლით დაიწყო, რაც თავისუფლების უკანონო აღკვეთას გულისხმობს.