მედიაორგანიზაციები მაუწყებლის შესახებ ირაკლი კობახიძის განცხადებას პასუხობენ

მედიაორგანიზაციები, რომლებიც “მაუწყებლის შესახებ” კანონში შესატან ცვლილებებს ეწინააღმდეგებიან,  ირაკლი კობახიძის იმ განცხადებას პასუხობენ, როდესაც პარლამენტის თავმჯდომარემ განაცხადა, რომ  ხელისუფლებასა და საზოგადოებრივ მაუწყებელზე მათი მხრიდან პოლიტიკური შტურმი ხორციელდება. ამის შესახებ მედიაორგანიზაციების მიერ გავრცელებულ განცხადებაში წერია.

“ჩვენთვის მიუღებელია, კანონის მოწინააღმდეგე მედიისა და სამოქალაქო სექტორის წარმომადგენლები ,,პოლიტიკურ აქტივად”  მოიხსენიებოდნენ. მიუღებელია, მედიასთან დაკავშირებულ საკითხებზე სიტყვა ეზღუდებოდეს მედიის წარმომადგენელს. კანონპროექტის განხილვის პროცესში მედიამაც და სამოქალაქო საზოგადოებამაც არაერთგზის წარუდგინა პარლამენტს დასაბუთებული არგუმენტები. ჩვენ მედიის მდგომარეობის გაუარესების თავიდან ასაცილებლად ყველაფერი გავაკეთეთ. იმედი გვაქვს, პარლამენტის თითოეული წევრი გააცნობიერებს თავის პასუხისმგებლობას და მხარს არ დაუჭერს მაუწყებლობის შესახებ კანონის სადავო რედაქციის ამოქმედებას,”-წერია განცხადებაში.

განცხადებას ორგანიზაცია მაუწყებელთა ალიანსი ავრცელებს, რომელიც რეგიონულ ტელე და რადიოკომპანიებს აერთიანებს. მათ შორის- ტელეკომპანია გურჯაანი, ტვ რიონი, TV 25 და სხვა.

მანამდე საიას თავმჯდომარე სულხან სალაძემ მაუწყებელთან დაკავშირებით შექმნილი ვითარებიდან გამოსავალზე ილაპარაკა. პარლამენტმა არც პრეზიდენტის ვეტო გაიზიაროს და შემდგომ კენჭისყრაზე არც კანონპროექტს დაუჭიროს მხარი- თვქა მან.

არასამთავრობო სექტორმა პარლამენტს მოუწოდა არ დაძლიოს პრეზიდენტის ვეტო მაუწყებლის კანონპროექტთან დაკავშირებით.

ამის შესახებ საერთაშორისო გამჭვირვალობის წარმომადგენელმა მამუკა ანდღულაძემ მედიას პარლამენტში განუცხადა, სადაც პარლამენტის თავმჯდომარესა და მედიაორგანიზაციებს შორის შეხვედრა შედგა.

მაუწყებლობის შესახებ კანონპროექტთან დაკავშირებით პრეზიდენტის მოტივირებულ შენიშვნებზე დარგობრივი ეკონომიკის კომიტეტმა 14 თებერვალს გადაწყვეტილება ვერ მიიღო. კომიტეტის წევრთა ხმები შუაზე გაიყო.

22 დეკემბერს პარლამენტში "მაუწყებლობის შესახებ" საკანონმდებლო პაკეტს მხარი მესამე მოსმენით, 63-მა პარლამენტარმა დაუჭირა.

საქართველოს პრეზიდენტმა მაუწყებლის კანონპროექტს ვეტო 15 იანვარს დაადო. 26 იანვარს კი პარლამენტის თავმჯდომარემ ირაკლი კობახიძემ მაუწყებლის კანონის შესახებ მედიაორგანიზაციებთან შეხვედრაზე თქვა: "ხელი მიკანკალებდა, როცა საზოგადოებრივი მაუწყებლის ბიუჯეტს ვიღებდით."