ნაციონალების ინიციატივას აბაშიძე-კარასინის ფორმატის შეწყვეტაზე ზურაბ აბაშიძე ეხმიანება

რუსეთთან ურთიერთობის საკითხებში პრემიერმინისტრის სპეციალური წარმომადგენელის ზურაბ აბაშიძის განცხადებით, არაგონივრული იქნება რჩევების მოსმენა მათგან, ვისაც რუსეთთან ურთიერთობებში ცუდი გამოცდილება აქვს. ინფორმაციას 1tv  ავრცელებს.

ეს განცხადება ზურაბ აბაშიძემ ოპოზიციის შეფასებებზე გააკეთა, რომელიც აბაშიძე-კარასინის მოლაპარაკებების ფორმატს აკრიტიკებს და მის გაუქმებას მოითხოვს.

მისი თქმით, საქართველოს საგარეო პოლიტიკის მთავარი მიმართულებები და ყველაზე პრობლემური საკითხები დასავლელ პარტნიორებთან განიხილება. საქართველო ამ საკითხებზე რეკომენდაციებს სწორედ მათგან ისმენს.

"ჩვენ ჩვენს საგარეო პოლიტიკურ საკითხებს, მთავარ მიმართულებებს, ყველაზე პრობლემურ საკითხებს, რა თქმა უნდა, დასავლელ პარტნიორებთან ერთად განვიხილავთ. ანუ მათთან, ვისაც ჭკუა მოეკითხება – ევროკავშირი, ნატო, ჩვენი ამერიკელი და ევროპელი პარტნიორები. ამ საკითხებს მათთან მუდმივად განვიხილავთ და მათგან ვისმენთ რეკომენდაციებს, რჩევებს. მუდმივი კონსულტაციების რეჟიმში ვართ დასავლელ პარტნიორებთან. რჩევებს მივიღებთ მათგან, ვისაც ჭკუა მოეკითხება და უკვე ჩამოვთვალე, ვისაც მოეკითხება. ვისაც აქვს ძალიან ცუდი გამოცდილება, ძალიან რბილად ვამბობ, რუსეთთან ურთიერთობებში, ვფიქრობ, მათგან რჩევების მოსმენა არ იქნება გონივრული გადაწყვეტილება“, – განაცხადა ზურაბ აბაშიძემ.

“ერთიანი ნაციონალური მოძრაობა“ აბაშიძე-კარასინის მოლაპარაკებების ფორმატის დროებით შეწყვეტას ითხოვს. ამის შესახებ „ნაციონალური მოძრაობის“ წარმომადგენელმა, დეპუტატმა სალომე სამადაშვილმა არჩილ ტატუნაშვილის საკითხზე საპარლამენტო რეზოლუციასთან დაკავშირებით განაცხადა, რომლის შესახებაც პარლამენტში ოპოზიციასა და უმრავლესობას შორის კონსულტაციები მიმდინარეობს.

"აბაშიძე-კარასინის მოლაპარაკებების ფორმატი დროებით უნდა შეწყდეს. ჩვენ არ ვსაუბრობთ იმაზე, რომ რუსეთთან ორმხრივი მოლაპარაკებების ფორმატი საერთოდ გაუქმდეს. საუბარია იმაზე, რომ ეს ფორმატი დროებით უნდა შეწყდეს, რადგან გაურკვეველია რა შედეგი მოაქვს, თუნდაც შექმნილ ვითარებაში, როდესაც პირდაპირ ჰუმანიტარული საკითხია ცხედრის გადმოსვენება და აღმოჩნდა, რომ ეს ფორმატი არაფერში გვადგება. აღნიშნული ფორმატი გაუმჭვირვალეა და არ ვიცით, რა მანდატი აქვს. ფორმატი პარლამენტმა უნდა დაამტკიცოს და მოლაპარაკებები პირველ რიგში, საგარეო საქმეთა სამინისტრომ უნდა აწარმოოს. სწორედ ამიტომ, ჩვენ აბაშიძე-კარასინის ფორმატის ცვლილება გვჭირდება“, - განაცხადა სამადაშვილმა.

ამასთან, დეპუტატი მიიჩნევს, რომ საგარეო საქმეთა სამინისტროს უნდა დაევალოს დაიწყოს მოლაპარაკებები, რათა რუსეთისთვის საერთაშირისო სანქციების დაწესების კონტექსტში საქართველოს პრობლემაც აისახოს.

5 მარტს ევროპულმა საქართველომ უმრავლესობას ტატუნაშვილთან დაკავშირებით რეზოლუციის საერთო დოკუმენტის შექმნა შესთავაზა. ბიუროს სხოდმაზე რეზოლუცია უმრავლესობამაც დაარეგისტრირა.

არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის სუნთქვის უკმარისობით გარდაიცვალა.