ოპოზიცია ძალის გამოუყენებლობაზე დეკლარაციის შესაძლო მიღებას აკრიტიკებს

საქართველოს საკითხზე შექმნილი ჟენევის დისკუსიის მონაწილეების მიერ ძალის გამოუყენებლობაზე დეკლარაციის შესაძლო მიღებას ქართული ოპოზიცია აკრიტიკებს. 

პარლამენტის ვიცესპიკერის, "ევროპული საქართველოს" წევრის, სერგი კაპანაძის აზრით, ჟენევის საერთაშორისო დისკუსიების ფარგლებში, ძალის გამოუყენებლობის შესახებ დეკლარაციაზე დათანხმება შეცდომა იქნება. ინფორმაციას სააგენტო "ინტერპრესნიუსი" ავრცელებს.

„ამ დეკლარაციაზე თანხმობას ვიძლეოდით იმ შემთხვევაში, თუ მას წინ უსწრებდა რუსეთის მიერ ძალის არგამოყენების იურიდიული ვალდებულების აღება. ფაქტია, რუსეთმა ეს ვალდებულება არ აიღო, მაშინ ამ დეკლარაციაზე დათანხმება რას გვაძლევს, სრულიად გაუგებარია. საქართველოს ძალის არგამოყენების ვალდებულება ისედაც აღებული აქვს 2010 წელს და 2013 წელს, ამიტომ ჩვენი მხრიდან არაფერი ახალი არ არის. რუსეთი თუ არ იღებს ამ ვალდებულებას ჩვენ მიმართ, ამ დეკლარაციის არსი რა არის, სრულიად გაუგებარია, მითუმეტეს იმ ფონზე, რაც ახლა ხდება - ტატუნაშვილის შემთხვევა მაქვს მხედველობაში“, - თქვა სერგი კაპანაძემ.

დეპუტატი არ იზიარებს საქართველოს საგარეო საქმეთა მინისტრის მოადგილის დავით დონდუას არგუმენტს იმის შესახებ, რომ ქართული მხარე ჟენევის დისკუსიების მონაწილეთა მიერ მისაღებ პოლიტიკურ განცხადებას შემდგომი საგნობრივი მოლაპარაკების გზაზე გადადგმულ ერთ-ერთ ნაბიჯად განიხილავს.

ხელმოწერას არ ეთანხმება არც "ნაციონალური მოძრაობის" წევრი და საგარეო საქმეთა ყოფილი მინისტრი გრიგოლ ვაშაძე. ვაშაძის შეფასებით, საქართველოს დელეგაციამ ჟენევაში რუსეთის მიმართ მთავარი მოთხოვნა მოხსნა, რაც ცალმხრივად ძალის გამოუყენებლობის საერთაშორისო ვალდებულების აღება იყო.

„რუსული პრესა, რუსულ დიპლომატიურ წყაროებზე დაყრდნობით ავრცელებს ინფორმაციას, რომ ჟენევაში ამ თვის ბოლოს დაგეგმილი კონსულტაციების რაუნდზე, ვციტირებ: „საქართველო, ე.წ. აფხაზეთის და სამხრეთ ოსეთის რესპუბლიკა, რუსეთის ფედერაცია, შეერთებული შტატები და ჟენევის კონსულტაციების თანათავმჯდომარეები, მიიღებენ დეკლარაციას, რომელის მიხედვითაც ჟენევის კონსულტაციებში მონაწილე ყველა მხარე უარს იტყვის ერთმანეთთან ურთიერთობაში ძალის გამოყენებაზე“. გასაგებია, რომ რუსული პრესა რუსულ დიპლომატიურ წყაროებზე დაყრდნობით იყენებს იმ ლექსიკას, რომელსაც მიჩვეულია, მაგრამ კიდევ უფრო ნიშანდობლივია საქართველოს საგარეო საქმეთა სამინისტროს ანერვიულებული კომენტარები, რაც იმაზე მიუთითებს, რომ უპირველეს ყოვლისა, საქართველოს დელეგაციამ, ჟენევის კონსულტაციებზე მოუხსნა რუსეთს კატეგორიული მოთხოვნა, რაც ჩვენი პოზიცია იყო ამ კონსულტაციების პირველივე დღიდან. კერძოდ, რუსეთს აეღო საქართველოს წინაშე ცალმხრივი სამართლებრივი ვალდებულება ძალის არგამოყენების შესახებ, ზუსტად ისევე, როგორც ეს გააკეთა საქართველოს პრეზიდენტმა მიხეილ სააკაშვილმა 2010 წლის 23 ნოემბერს, როდესაც თავის გაგზავნილ წერილში გაეროს, ეუთოს, ევროკავშირს, ნატოს და ა.შ. საქართველომ საერთაშორისო სამართლებრივი ვალდებულება აიღო ძალის არგამოყენების შესახებ“, - განაცხადა ვაშაძემ. 

მისივე შეფასებით, დეკლარაციის მიღების შემთხვევაში, საქართველო რუსეთს საშუალებას მისცემს, რომ ეს დეკლარაცია პროპაგანდისტული მიზნებისთვის გამოიყენოს.

„ამიერკავკასიას ზეპირი მშვიდობისთვის ამზადებენ“, - ამ სათაურით გამოაქვეყნა სტატია რუსულმა „კომერსანტმა“. გაზეთი წერს, რომ საქართველოს საკითხზე შექმნილი ჟენევის დისკუსიის მონაწილეები ძალის გამოუყენებლობაზე დეკლარაციის მიღებას გეგმავენ.

ამ სტატიას გუშინ საგარეო საქმეთა მინისტრის მოადგილე დავით დონდუა გამოეხმაურა.